“The cover up” loyihasidagi ishtiroki bilan muxlislar eʼtiboriga tushgan xonanda Afruza bugungi kunda o‘z yo‘nalishiga ega ijodkor. Yosh xonanda endigina 28 yoshni qarshiladi, ammo uni kuzatuvchilar va qo‘shiqlarini sevib tinglovchilar oz emas.
Afruza taxallusi bilan ijod qiladigan xonandaning asli ism-sharifi Dilafro‘z Rustamova bo‘lib, u 1996-yil Farg‘ona shahrida tavallud topgan. U O‘zbekiston davlat konservatoriyasining Estrada xonandaligi fakultetini tamomlagan.
“Qizlar bilan kelisholmasdim”
— Oilada ikkita farzandmiz, akam bilan o‘rtamizda bor-yo‘g‘i ikki yosh farq bor. Shu bois akam bilan birga o‘ynab ulg‘ayganmiz. Unga qo‘shilib o‘g‘il bolalar bilan ko‘p o‘ynaganim uchunmi, qizlar bilan unchalik kelisholmasdim. O‘ylab qarasam, bolaligimda anchayin sho‘x-shaddod qiz bo‘lganman.
Maktabda esa aʼlochi va tartibli o‘quvchi edim. Chunki oilamizda tartibga jiddiy eʼtibor berishardi. Onam kechqurun to‘ydan nechada qaytishlaridan qatʼi nazar, uyda hamma narsa joyida bo‘lishini talab qilardi. Agar hammasi ko‘ngildagidek bo‘lmasa, tonggacha bo‘lsa-da, ishlarini qilib, keyin uxlardi, deydi Afruza.
“Nega aynan Afruza?”
— Nega ota-onangizning familiyasi bilan sahnaga chiqmagansiz, deb ko‘p so‘rashadi. Aslida, taxallus bilan ijod qilishimni otamning o‘zi xohlagan. Teleloyihada ishtirok etishdan avval taxallus borasida rosa o‘ylanganmiz. O‘z ismim ham juda yoqadi, ammo sahnada nomim jaranglashi uchun u qisqa bo‘lishi kerak edi. Shu bois Afruza taxallusini tanlaganmiz, deydi xonanda.
“Onamning xonanda ekanini aytmadim”
— Sanʼat oilamizga begona emas. Onam xonanda, dadam esa sozanda. Amakim, kelinoyim ham sanʼat sohasida faoliyat yuritishadi. Ammo sanʼatkorlar oilasidan ekanimni sir saqlaganman. Odamlar orasida “tanish-bilishchilik qilishibdi” degan gap tarqalishi va ishtirokim ko‘ngildagidek bo‘lmasa, yaqinlarimni uyaltirib qo‘yishdan qo‘rqqanman. Shu bois ancha vaqtgacha onam mashhur xonanda Shahlo Rustamova ekanligini aytmaganman, deydi Afruza.
“Eng yaxshi tanqidchim — dadam”
— Qo‘shiqlarimni oilaviy birga tanlaymiz, uni ijro etishdan avval yaxshilab muhokama qilamiz. Eng yaxshi tanqidchim dadam bo‘ladi. Raqsbop bo‘lsin deb “Vot takaya” nomli qo‘shiqni ijro etganman. Ammo haligacha dadam “Shuni bekor aytgansan-da”, deydi.
Ilgari asosan jahon estradasi qo‘shiqlarini kuylardim. Hozir ham o‘zim uchun bunday qo‘shiqlarni ijro etib turaman, deydi Afruza.
“Yorqinxo‘ja Umarov — mening akam”
— Sanʼatkor kim bilandir birga duet kuylasa yoki ijodiy hamkorlik qilsa, darrov ular o‘rtasida qandaydir munosabat bor, deb taxmin qilishadi. Yorqinxo‘ja Umarov bilan ham ko‘p gap-so‘zlarga sabab bo‘lganmiz. U insonni nafaqat ijodkor, balki inson sifatida ham hurmat qilaman. “The cover up” loyihasida ishtirok etmasdan avval tanirdim, degandi Afruza intervyularining birida.
U aktyorga kelin bo‘ldi!
Shu yilning 25-sentyabr kuni poytaxtdagi to‘yxonalardan birida xonanda Afruzaning nikoh kechasi bo‘lib o‘tdi. Nikoh oqshomida o‘zbek kinosi va musiqa sanʼatining ko‘plab taniqli vakillari ishtirok etdi. Xonandaning turmush o‘rtog‘i Behruz Ahmedov — O‘zbek milliy akademik drama teatri aktyori Botir Muhammadjonovning o‘g‘li. U ssenarist va musiqiy prodyuser sifatida faoliyat yuritadi. Behruz avvalroq Afruza bilan AQSH safari chog‘ida uning qo‘lini so‘ragan edi.
Izoh (0)