Livanning “Hizbulloh” harakati bosh kotibi Naim Qosim “terrorchilarga qarshi” kurashda Suriyaga yordam berishga va’da berdi. Bu haqda u Al Manar telekanali orqali efirga uzatilgan nutqida aytib o‘tdi.
“Hizbulloh” Suriya bilan birgalikda unga qarshi bosqinchilik maqsadlarini amalga oshirishga imkon qadar to‘sqinlik qiladi, deydi u.
Uning so‘zlariga ko‘ra, Suriyadagi isyonchi guruhlarning hujumiga “AQSH va Isroil tomonidan homiylik qilinmoqda”. Shu munosabat bilan Qosim Isroilga qarshi turishda “Hizbulloh”ni qo‘llab-quvvatlashga chaqirdi.
Suriyadagi vaziyat
Isyonchilarning Halab provinsiyasi g‘arbiy qismida hukumat kuchlariga qarshi keng ko‘lamli hujumi 27-noyabr kuni boshlandi. Ikki kundan so‘ng ular 2016-yildan beri birinchi marta Halab shahriga kirdi. Hujumga Suriyadagi fuqarolar urushi davrida Asadga qarshi chiqqan “Hayot Tahrir ash-Sham” terrorchilik tashkiloti boshchilik qildi.
30-noyabr kuni Suriya armiyasi Halabdan “qo‘shinlarni vaqtincha olib chiqib ketishi”ni e’lon qildi. Ammo Asad Suriya “do‘stlari va ittifoqchilari yordamida terrorchilarni yo‘q qilishga qodir”ligini ishonch bilan ta’kidlab, terrorizmni yo‘q qilishni “mintaqadagi barqarorlik va xavfsizlik” garovi deb atadi.
Suriya prezidenti Bashar Asad mamlakatdagi vaziyat yuzasidan Isroildan yordam so‘radi. Murojaat Asadning Yevropadagi yordamchilaridan biri orqali Isroil tomoniga yetkazilgan. Ushbu so‘rovga yahudiy davlati tanqidiy javob bergan. Jumladan, Isroil hukumati Suriyadagi vaziyat ularni tashvishga solmasligini aytib, “avvalo Suriyadan Eronparast ko‘ngillilarni olib tashlash, so‘ngra yordam so‘rash” kerakligini maslahat bergan.
Izoh (0)