Microsoft asoschilaridan biri Bill Geyts ko‘p yillardan buyon “The Gates Notes” (Geyts qaydlari) nomli blog yuritib keladi. Unda milliarder yil davomida o‘qigan kitoblaridan eng sara va sevimli beshta asar haqida ma’lumot beradi. Joriy yilda esa Geyts atrofimizdagi dunyoni hamda jamiyat boshdan kechirayotgan o‘zgarishlarni tushunishga yordam beradigan kitoblar ro‘yxatini e’lon qildi.
Kitoblar muhandislik sohasidagi innovatsion g‘oyalar bo‘yicha qo‘llanma, sun’iy intellektning hayotimizga ta’siri, zamonaviy texnologiyaning yoshlar hayotidagi o‘rni haqidagi turli mavzularni o‘z ichiga oladi.
“Tugallanmagan sevgi hikoyasi” — Doris Kerns Gudvin
“Men doim Doris Kirns Gudvinning kitoblarini katta qiziqish bilan mutolaa qilganman, lekin uning yangi avtobiografiyasi muallifning shaxsiy hayotiga boshqacha nigoh bilan qarash imkonini berdi”, deydi Bill Geyts.
Kitobda uning Richard Gudvin bilan nikohi haqida hikoya qilinadi. Muallifning turmush o‘rtog‘i AQSh prezidentlari Jon F. Kennedi va Lindon Jonsonning siyosiy maslahatchisi bo‘lgan. U Amerika tarixidagi eng qiyin davrlardan birida yashab o‘tgan.
“Dorisning iste’dodi tufayli asardagi sevgi hikoyasi Kennedining o‘ldirilishi yoki Vyetnam urushi kabi muhim tarixiy voqealar kabi ta’sirchan chiqqan”, deb yozadi Geyts.
“Muhandislik sohasiga oddiy nazar” — Grendi Hillhaus
Geytsning so'zlariga ko‘ra, mazkur kitob nima uchun quvur yoki transformator kabi tushunarsiz obyektlar kerak ekanligi haqidagi savollarga javob beradi. Hillhaus uyali aloqa minoralardan tortib kabel qutilarigacha zamonaviy infratuzilma qanday ishlashi haqida batafsil tushuntirib bergan.
“Bu asar bizni o‘rab turgan dunyoning ko‘plab sirlarini ochib beradi” deydi milliarder.
“Yaqinlashib kelayotgan to‘lqin” — Mustafo Sulaymon
Geyts mazkur asarni sun’iy intellekt haqidagi o‘qigan barcha kitoblari ichida eng yaxshisi, deb hisoblaydi. Unda Mustafo Sulaymon sunʼiy intellekt va ilmiy tadqiqotlar bo‘yicha o‘z tajribasi bilan o‘rtoqlashgan. U biotexnologiya va genlarni tahrirlash kabi zamonaviy texnologiyalar dunyoni qanday tarzda o‘zgartirib borayotgani haqida ilmiy dalillar keltirgan.
Shuningdek, muallif insoniyat duch keladigan imkoniyatlar va tahdidlar, yangi texnologiyalar imkoniyatlarini maksimal darajada oshirish uchun xavf-xatarlardan qanday qochish kerakligi haqida batafsil ma’lumot bergan hamda sun’iy intellektning afzalliklari va kamchiliklarini ham yoritgan.
“Tashvishda qolgan avlod” — Jonatan Haydt
“Ushbu kitobni yoshlarga ta’lim berayotgan yoki ular bilan ishlayotganlar o’qishi shart. Bu asar meni kattalar nazoratisiz ko‘chalarda, sarguzashtlar va hazillar bilan o‘tkazgan bolaligim haqida o‘ylashga majbur qildi”, deydi Microsoft asoschisi.
Muallif faol va bebosh bolalikdan raqamli va texnologiyalar asridagi bolalikka o‘tish yangi avlodning hissiy rivojlanishiga qanday ta’sir qilishi haqida ma’lumot bergan. Geytsga Jonatan Haydtning nafaqat muammoni yoritishi, balki vaziyatni o‘zgartirishga yordam beradigan turli yechimlarni taklif qilishi ayniqsa yoqdi.
“Federer”, Doris Henkel
Bill Geyts asoschisi Rojer Federer haqidagi mazkur kitobni “tennis muxlislari uchun ajoyib sovg‘a”, va “shvetsariyalik tennischi muxlislari uchun esa “xazinaning o‘zginasi” deb atadi. Nashr ko‘plab nodir va tarixiy fotosuratlarni o‘z ichiga oladi va sportchining karyerasiga chuqurroq nazar tashlaydi.
Izoh (0)