AQSHning Kaliforniya shtati shimolida 7 magnitudali zilzila sodir bo‘ldi. Bu haqda AQSH Geologiya xizmati xabar berdi.
San-Fransisko ko‘rfazi hududida zilzilalar qayd etildi. Kaliforniya va Oregon shtatlarining qirg‘oqbo‘yi aholisiga quyidagicha ogohlantirish yuborildi: “Sizning yaqiningizdagi qirg‘oqqa bir qator kuchli to‘lqinlar va shiddatli oqimlar urilishi mumkin. Siz xavf ostisiz. Qirg‘oq suvlaridan tezda uzoqlashing”.
Geologiya xizmati ma’lumotlariga ko‘ra, zilzila mahalliy vaqt bilan soat 10:44 da (Toshkent vaqti bilan kechasi 23:44 da) yuz bergan, uning episentri Gumbold okrugidan taxminan 10 milya (16 kilometr) janubi-g‘arbda joylashgan.
Zilziladan uch daqiqa o‘tib, Santa-Roza shahri shimolida 5,8 magnitudali silkinish sodir bo‘ldi. 4-dekabr kuni ushbu hududda 4,2 va 4,4 magnitudali silkinishlar qayd etilgandi.
AQSHda kuzatilgan so‘nggi kuchli zilzilalar
2014-yilning yozida Kaliforniyada 6 magnitudali zilzila sodir bo‘ldi. Bu o‘sha paytdagi so‘nggi 25 yildagi eng kuchli zilzila edi. Uning episentri Amerika Kanoni shahridan 6 kilometr shimoli-g‘arbda va Napa shahridan 9 kilometr janubda joylashgan.
2019-yil yozida 6,4 magnitudali zilzila Los-Anjelesdan 196 kilometr uzoqlikda qayd etilgan, zilzilalar Las-Vegasda sezilgan. U 1994-yildan beri Kaliforniyaning janubida eng kuchlisi bo‘lgandi.
Izoh (0)