Rossiya prezidenti Vladimir Putin Rossiya gazi uchun to‘lovlar endi muayyan bir bank orqali hisob-kitob qilinmasligini nazarda tutuvchi farmonni imzoladi. Tegishli hujjat Huquqiy axborot rasmiy portalida e’lon qilindi.
Ilgari bunday yagona moliyaviy institut ikki hafta oldin AQSH sanksiyalariga uchragan “Gazprombank” edi. Shu tufayli Putin 2022-yil 31-martdagi o‘z farmoniga o‘zgartirish kiritdi. O‘sha farmonda “Gazprombank”ka Rossiya gazi uchun to‘lovlarni qabul qiluvchi yagona muassasa bo‘lish vakolati berilgandi.
Bunday moliyaviy operatsiyalarni amalga oshirish uchun chet ellik xaridorlar maxsus rubl va valyuta hisobvaraqlarini ochishlari kerak bo‘lgan. Sanksiyalar kiritilgandan so‘ng, ushbu hisobvaraqlar o‘z-o‘zidan dolzarbligini yo‘qotadi.
Putinning yangi farmonida chet el kompaniyasi gaz uchun to‘lovni “uchinchi shaxslar” orqali amalga oshira olishi ta’kidlangan.
Endi gaz uchun to‘lov majburiyatlarini nafaqat pul bilan, balki “o‘zaro qarzlarni hisobga olish” orqali ham bajarish mumkin bo‘ladi, deb yozmoqda The Bell nashri.
AQSH Rossiyaning 50 ta banki, jumladan, “Gazprombank”ga qarshi sanksiyalar kiritdi
21-noyabr kuni AQSHning yangi sanksiyalar paketiga Rossiyaning 50 dan ortiq banki, 40 ta qimmatli qog‘ozlar ro‘yxatga oluvchisi va moliya sohasiga aloqador 15 nafar amaldor kirdi. Ular orasida Buyuk Britaniya, Kanada, Avstraliya va Yangi Zelandiyaning xuddi shunday ro‘yxatlarida allaqachon mavjud bo‘lgan “Gazprombank” ham bor.
UnionPay kartalari ishlashni to‘xtatdi
O‘sha kunning o‘zida “Gazprombank” xorijdagi UnionPay karta egalarini “qiyinchiliklar” haqida ogohlantirdi va ularga “yaqin vaqt ichida naqd pul yechib olish”ni maslahat berdi. Xususan, “Gazprombank” tomonidan chiqarilgan UnionPay tizimi kartalari kamida sakkizta mamlakatda: Turkiya, BAA, Tailand, Vengriya, Germaniya, Qatar, Qozog‘iston va Xitoyda ishlamay qoldi. Italiya, Urugvay, Argentina va Indoneziyada ham karta egalari muammolarga duch keldi.
“Gazprombank”ning o‘zi bu kartalarni rasmiylashtirish va chiqarishni to‘xtatdi. “Kommersant” gazetasining ma’lumotlariga ko‘ra, bank o‘z veb-saytida UnionPay kartalarini rasmiylashtirish mumkin bo‘lganlar ro‘yxatdan olib tashlagan.
Izoh (0)