Gruziya sobiq prezidenti Mixail Saakashvili Aleksey Navalniyni Rossiyaning bo‘lajak prezidenti deb atadi. Siyosatchi o‘zining Facebook’dagi sahifasida tegishli postni qoldirdi.
Saakashvili shu tariqa Navalniyning yaqinda Gruziya sobiq prezidentini davolanish uchun qamoqdan ozod qilish haqidagi chaqirig‘iga javob qaytardi.
“Mening fikrimcha, yaqinda Rossiyadan qoladigan bo‘lajak prezident Aleksey Navalniy bilan mening ikkita umumiy jihat birlashtiradi: ikkalamiz ham korrupsiya bilan teng darajada murosasizmiz va Vladimir Putinning asosiy dushmanimiz”, — deydi Gruziya sobiq prezidenti.
Shuningdek, u Navalniyga “omon qolish, ozod bo‘lish va ko‘zlangan maqsadga erishishni” tilagan.
Qamoqdagi Gruziya sobiq prezidenti Saakashvilining salomatligi keskin yomonlashgan. Siyosiy mahbus hozir hayot-mamot yoqasida ekanini ta’kidlagan. U qiynoqda o‘lishi Putinning g‘alabasi bo‘lishini qayd etgandi.
Saakashvilini Gruziyada hibsga olish va qiynoqlar
2021-yil 1-oktabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)