Gruziyaning sobiq prezidenti Mixail Saakashvili unga yaratilgan barcha sharoitlarga qaramay, normal ovqatlanishdan bosh tortishda davom etmoqda. Bu haqda Gruziya adliya vaziri Rati Bregadze brifingda ma’lum qildi.
“Mahbus Saakashvili haligacha davolanish kursiga to‘liq rioya qilmayapti va shifokorlar tavsiya qilgan ovqatni yemayapti. Biz mahbusni hamda uning sog‘ayib ketishidan chin dildan manfaatdor bo‘lgan odamlarni hiyla-nayranglar o‘rniga, shifokorlar tavsiyalariga amal qilishga, shifokorlar aytgan miqdordagi va muayyan turdagi taomlarni iste’mol qilishga chaqiramiz”, — dedi Bregadze.
Vazirning aytishicha, Saakashvili o‘ziga o‘zi zarar yetkazyapti. Unga ko‘ra, sobiq prezidentning sog‘lig‘i o‘z qo‘lida, agar odam o‘z xohishi bilan davolanmasa va faqat o‘zi xohlagan taomni iste’mol qilsa, vazirlik uni yeb-ichishga yoki davolanishga majburlay olmaydi.
Vazirning ta’kidlashicha, Saakashvili davolanayotgan “Vivamed” klinikasida unga barcha sharoitlar yaratilgan va uning barcha huquqlari hurmat qilinadi.
3-iyul kuni Saakashvili 2007-yildagi mitingni kuch bilan bostirish bo‘yicha unga qarshi qo‘zg‘atilgan ish ko‘rib chiqilayotgan sud majlisida videoaloqa orqali ishtirok etdi. Sud zalidan olingan kadrlarda 2021-yil oktabr oyidan beri hibsda saqlanayotgan Gruziyaning sobiq prezidenti qanchalik ozib ketganini ko‘rish mumkin.
Bundan tashqari, sobiq prezidentning ukasi David Saakashvili Mixail “vazn yo‘qotishda davom etayotganini va o‘limga qarab ketayotganini” aytdi. Shuningdek, u Mixail Saakashvilini zaharlashgani ehtimolini inkor etmadi.
Ukraina prezidenti Vladimir Zelenskiy Gruziya sobiq prezidentining ozib ketganiga izoh berar ekan, “Rossiya Ukraina fuqarosi Mixail Saakashvilini Gruziya hukumatining qo‘li bilan o‘ldirmoqda” dedi.
Izoh (0)