Polsha shifokorlari Tbilisida hibsda saqlanayotgan Gruziyaning sobiq prezidenti Mixail Saakashvili bilan uchrashishga muvaffaq bo‘ldi. Polsha gumanitar tibbiy yordam ittifoqi (ZPHM) mutaxassislari mahbusni keng qamrovli tekshiruvdan o‘tkazishni boshladi, deb yozdi Polsha bosh vaziri Mateush Moravetskiy 12-iyul kuni Twitter’da.
Polsha shifokorlari Gruziyaga Yevropa Ittifoqi nomidan kelgan: Saakashviliga tibbiy missiya yuborish qarori yarim yil avval Bryusselda qabul qilingan edi.
“Olti oylik kechikishdan so‘ng hukumat nihoyat shifokorlarga Mixail Saakashvilini kasalxonada ko‘rikdan o‘tkazishga ruxsat berdi. Shifokorlar uning ahvolini o‘rganib, keyin o‘z xulosalarini chiqaradi”, — dedi AFP’ga Saakashvilining advokati Dito Sadzaglishvili.
Saakashvili tanib bo‘lmas darajada ozib ketgan
3-iyul kuni Mixail Saakashvili 2007-yildagi mitingni kuch bilan bostirish ishi bo‘yicha sud majlisida videoaloqa orqali ishtirok etganidan so‘ng Gruziya sobiq prezidentining sog‘lig‘iga xalqaro e’tibor yana kuchaydi. Sudlanuvchi juda zaif va ozib ketgan holda ko‘rinish berdi.
O‘sha kuni Ukraina prezidenti Vladimir Zelenskiy “Rossiya Ukraina fuqarosi Mixail Saakashvilini Gruziya hukumatining qo‘li bilan o‘ldirmoqda”, deya Gruziyani uni Ukrainaga davolanish uchun yuborishga chaqirdi. U shuningdek, Ukraina Tashqi ishlar vazirligiga Gruziya elchisi Georgiy Zakarashvilining Tbilisida maslahatlashuvlar o‘tkazish uchun mamlakatni tark etishini so‘rashni topshirdi. Oradan ko‘p o‘tmay, elchi Kiyevni tark etdi.
2023-yil aprel oyi boshida Mixail Saakashvili Amerikaning Politico nashriga yo‘llagan maktubida o‘lim yoqasida ekanini ta’kidlab, AQSH, Yevropa Ittifoqi va xalqaro hamjamiyatni “o‘z hayotini saqlab qolish uchun hamma narsani qilishga” chaqirgandi.
Izoh (0)