“Rossiya Gruziya hukumatining qo‘li bilan Ukraina fuqarosini o‘ldirmoqda”. Zelenskiy Saakashvilini davolanishi uchun Ukrainaga topshirishga chaqirdi

Ukraina prezidenti Vladimir Zelenskiy Gruziya sobiq prezidentining ijtimoiy tarmoqlarda paydo bo‘lgan suratlariga izoh berar ekan, “Rossiya hozirda Ukraina fuqarosi Mixail Saakashvilini Gruziya hukumatining qo‘li bilan o‘ldirmoqda” dedi.

Zelenskiy Ukraina rasmiylari Gruziyani Saakashvilini Kiyevga topshirishga bir necha bor chaqirganini eslatdi. Bu safar, prezidentning so‘zlariga ko‘ra, u tashqi ishlar vaziri Dmitriy Kulebaga Gruziyaning Ukrainadagi elchisini chaqirib, unga keskin norozilik bildirishni hamda rahbariyati bilan maslahatlashish uchun mamlakatni tark etishni taklif qilishni buyurgan.

“Men yana bir bor Gruziya hukumatini Ukraina fuqarosi Mixail Saakashvilini zarur darajada davolanish va parvarish uchun Ukrainaga topshirishga chaqiraman. Hamkorlarimizni bu holatni e’tiborsiz qoldirmaslikka va bu insonni qutqarishga chaqiraman. Yevropada hech bir kuch odamlarni qatl qilishga haqli emas, inson hayoti Yevropaning asosiy qadriyatidir”, — dedi Zelenskiy o‘z postida.

3-iyul kuni Saakashvili 2007-yildagi mitingni kuch bilan bostirish bo‘yicha unga qarshi qo‘zg‘atilgan ish ko‘rib chiqilayotgan sud majlisida videoaloqa orqali ishtirok etdi. Sud zalidan olingan kadrlarda 2021-yil oktabr oyidan beri hibsda saqlanayotgan Gruziyaning sobiq prezidenti qanchalik ozib ketganini ko‘rish mumkin.

Bundan tashqari, sobiq prezidentning ukasi David Saakashvili Mixail “vazn yo‘qotishda davom etayotganini va o‘limga qarab ketayotganini” aytdi. Shuningdek, u Mixail Saakashvilini zaharlashgani ehtimolini inkor etmadi.

• Mixail Saakashvili 2021-yilning kuzidan beri hibsda. U chegarani noqonuniy kesib o‘tib, Gruziyaga qaytganidan keyin qo‘lga olingan. Qamoqxonada Saakashvilining sog‘lig‘i sezilarli darajada yomonlashdi. 2022-yil may oyidan beri siyosatchi Tbilisidagi Vivamed klinikasida. Sud majlislarida 20 nafar shifokor Saakashvilining ahvoli og‘ir ekanini aytdi.
• 2023-yilning fevralida Saakashvilining vazni 67 kilogramm ekani xabar qilingandi. Hibsga olinishidan oldin uning vazni 116 kilogramm, bo‘yi 195 santimetr bo‘lgan.