Gruziya sobiq prezidenti Mixail Saakashvili Tbilisi shahar sudining 2007-yil noyabridagi namoyishni tarqatib yuborish ishi bo‘yicha yig‘ilishida video aloqa orqali ishtirok etdi. Bu haqda “Mtvari” xabar berdi.
Siyosatchi aks etgan kadrlarda uning tom ma’noda tanib bo‘lmas darajada ozganini ko‘rish mumkin. Mixail Saakashvilining ukasi siyosatchi hibsda xuddi shunday sur’atda vazn yo‘qotishda davom etsa, o‘lishi mumkinligidan xavotirda.
“Haqiqatan ham vaziyat yaxshi emas, vazn dahshatli. Mixailning vazni necha kilogramm ekanini aytishga tayyor emasman, lekin haqiqat shundaki, u vazn yo‘qotishda davom etmoqda va o‘lim tomon ketmoqda”, — dedi David Saakashvili.
Uning fikricha, akasining ozishi unga jazoni o‘tash chog‘ida qo‘pol munosabatda bo‘linganidan, og‘ir sharoitda saqlanganidan dalolat beradi. Bundan tashqari, sobiq prezidentni zaharlashga urinish kuzatilgan bo‘lishi mumkinligi, bu uning ahvoliga ta’sir qilgani aytilgan.
Davidning qo‘shimcha qilishicha, bir muncha vaqt o‘tgach, tarixchilar haqiqatni ochib berishadi.
Saakashvilini Gruziyada hibsga olish va qiynoqlar
2021-yil 1-oktabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)