Hindiston Rossiyadan mudofaa uskunalari buyurtmalarini keskin qisqartirdi, shu bilan birga, G‘arb mamlakatlaridan qurol-yarog‘ sotib olishni faol ravishda boshladi. Bu haqda Bloomberg xabar berdi.
Qayd etilishicha, 2023-yilda Hindiston Rossiyadan jami qurollarning 36 foizini sotib olgan bo‘lsa, 2009-yilda bu ko‘rsatkich 76 foizni tashkil etgan.
“Bu ko‘p yillardan buyon ruslardan qurol xarid qilib kelayotgan davlat siyosatidagi keskin o‘zgarishdir”, deb ta’kidlaydi nashr.
Jurnalistlarning ma’lum qilishicha, bundan tashqari, Hindiston hukumati Rossiya bilan birgalikda vertolyotlar va zamonaviy qiruvchi samolyotlar yaratish va ishlab chiqarish rejalarini keyinga qoldirgan hamda harbiylarini tayyorlash uchun suvosti kemasini ijaraga olmagan.
Nashrning aniqlik kiritishicha, Hindiston G‘arb davlatlaridan ko‘proq qurol va xizmatlar sotib olishni boshlagan, shuningdek, AQSH va Fransiya ko‘magida o‘z harbiy qurilmalarini ishlab chiqarishni yo‘lga qo‘ygan.
Qayd etilishicha, hukumat Rossiyadan arzon energiya sotib olishda va Rossiya prezidenti Vladimir Putinga diplomatik yordam ko‘rsatishda davom etayotgan bo‘lsa-da, Nyu Dehli Moskvaga qaramlikni kamaytirish uchun shunday qadamlar tashlamoqda.
Hindiston va Rossiya miltiq va raketalar ishlab chiqarish bo‘yicha hamkorlikni davom ettirmoqda. Hindiston, shuningdek, Rossiya yadro texnologiyasiga qaramdir.
“Rossiya Hindistonga o‘zining yadroviy suvosti kemalarini taklif qilgan yagona davlat bo‘lib qolmoqda, chunki ikkala tomon yadroviy muammolarni muhokama qilish yo‘lini topmaguncha, Hindistonning G‘arb davlatlari bilan hamkorligi to‘liq bo‘lmaydi”, deydi siyosatchilar.
Sentyabr oyida Rossiyadan Hindistonga olmos yetkazib berish 2023-yilning shu davriga nisbatan 96 foizga yoki deyarli 25 baravarga kamaygan edi.
Izoh (0)