Hindiston hukumati Rossiya bilan avval tuzilgan shartnoma asosida Moskvadan qurol olish, ammo Rossiyaga pul o‘tkazishni taqiqlovchi AQSH sanksiyalariga tushib qolmaslik yo‘lini qidirmoqda. Hindiston hukumatidagi manbalarning Bloomberg agentligiga aytishicha, hozir Rossiya Hindistonga qurol yetkazib berishni to‘xtatilgan.
Agentlik maʼlumotlariga ko‘ra, bir yildan ortiq vaqtdan beri Rossiya Hindistonga mo‘ljallangan qurollar uchun 2 milliard dollarga yaqin to‘lovni ololmayapti. Rossiya rasmiylari Hindistonga topshirilgan qurollarga ehtiyot qismlarini yetkazib berish uchun taxminan 10 milliard dollarlik kredit liniyasini to‘xtatgan, shuningdek, S-400 raketaga qarshi mudofaa tizimining ikkita batareyasini bermagan.
Rossiya Hindistonning eng yirik qurol yetkazib beruvchisi hisoblanadi, bu qurollar Dehliga Pokiston va Xitoy bilan chegaradagi kelishmovchiliklarda ishlatish uchun zarur.
Bloomberg yozishicha, Hindiston Rossiyaga qurol-yarog‘ uchun to‘lovni dollar yoki rublda berishni istamayapti, bundan maqsad — AQSH sanksiyalari va rus valyutasini sotib olish bilan bog‘liq xarajatlardan qochish. O‘z navbatida, Hindiston tomonidan taklif qilingan rupiydagi hisob-kitoblar varianti ushbu valyutaning o‘zgaruvchanligi sabab Rossiyaga mos kelmaydi.
Agentlikning ta’kidlashicha, qurollarga Hindiston Rossiya neftini sotib olish sxema kabi yevro va BAA valyutasida haq to‘lashi mumkin edi. Biroq Hindiston bunday savdo ham AQSH sanksiyalariga duch kelishi mumkinligidan xavotirda.
Ma’lumot uchun, Rossiya Hindistonning eng yirik qurol yetkazib beruvchisi, Hindiston esa shunga mos ravishda Rossiya harbiy-sanoat kompleksi uchun eng muhim bozorlardan biri hisoblanadi.
Izoh (0)