Braziliya prezidenti Luis Inasiu Lula da Silva Vladimir Putinning Sankt-Peterburgga tashrif buyurish taklifini rad etdi. Bu haqda u 26-may kuni Rossiya prezidenti bilan telefon orqali suhbatdan so‘ng ma’lum qildi.
“Men (Putin) Sankt-Peterburgdagi Xalqaro iqtisodiy forumga taklif qilgani uchun minnatdorlik bildirdim va hozir Rossiyaga bora olmayman, deb javob berdim”, — deb yozdi u Twitter’dagi mikroblogida.
Shu bilan birga, Lula Rossiya va Ukraina o‘rtasidagi tinchlik muzokaralarida ishtirok etishga tayyorligini tasdiqlab, Braziliya “Hindiston, Indoneziya va Xitoy bilan birga tinchlikka erishish yo‘lida mojaroning har ikki tomoni bilan gaplashishga tayyor”ligini aytdi. Xitoy singari Braziliya ham o‘zini “neytral” davlat va urushayotgan tomonlar o‘rtasida “vositachi” sifatida ko‘rsatishga harakat qilmoqda.
Avvalroq Lula Kiyevga qurol-yarog‘ yetkazilishiga qarshi chiqib, G‘arb davlatlarini “urushni cho‘zayotgan va rag‘batlantirayotganlikda” ayblagan edi. Ushbu bayonotlar qattiq tanqid qilindi, shundan so‘ng Braziliya prezidenti birinchi marta Rossiyaning Ukrainaga bostirib kirishini qoraladi, ammo Kiyev va Moskva o‘rtasida tinchlik muzokaralari zarurligini ta’kidlashda davom etdi.
22-may kuni Lula da Silva va Ukraina prezidenti Vladimir Zelenskiyning Xirosimadagi Yettilik guruhi (G7) sammiti doirasidagi uchrashuvi barbod bo‘ldi. Shu munosabat bilan Braziliya prezidenti Zelenskiy bilan uchrashishda ma’no ko‘rmayotganini aytdi, chunki na Moskva, na Kiyev “tinchlik haqida gaplashmoqchi emas”.
Izoh (0)