“Daryo” nashri 24-martda O‘zbekiston va jahonda sodir bo‘lgan eng muhim voqealarni eʼtiboringizga havola etadi.
Ukrainaga qurol yetkazish kechiksa, Rossiya jang maydonida ustunlikka ega bo‘ladi
Davom etayotgan urush fonida Ukrainaga qurol-yarog‘ yetkazib berish yanada kechiksa, Rossiya jang maydonida ustunlikka ega bo‘ladi.
Washington post xabariga ko‘ra, hozirda Ukraina armiyasining harakatlanishi harbiy texnika yetkazib berishdagi muammo sababli sekinlashgan.
Nashr tahlil qilmoqdaki, “Kremlning Xitoy va Eron bilan ittifoqchilik aloqalarini mustahkamlashdan xavotirlanib, Pentagon Abrams tanklarini Ukrainaga yetkazib berishni tezlashtirmoqchi. Polsha va Slovakiya esa Ukrainani qiruvchi samolyotlar bilan ta’minlashga qaror qilgan.
Xabarda Abrams tanklari Ukraina qo‘shinlarining bahorgi qarshi hujumidan taxminan olti oy o‘tgach, yetkazib berilishi aytilgan.
Hindiston va Rossiya harbiy qurol yarog‘ yetkazishdagi hamkorlik to‘xtatiladimi?
Rossiya qurol eksporti bo‘yicha dunyoda ikkinchi o‘rinda tursa-da, Ukrainadagi keng ko'lamli urush yilida rus harbiylarining o'zlari jiddiy qurol taqchilligiga duch kelishdi.
Ayni paytda Hindiston harbiy-havo kuchlari vakili Rossiya Ukrainadagi urush tufayli qurol-yarog‘ bo‘yicha o‘z majburiyatlarini bajara olmasligini ma‘lum qildi.
Hindiston 2018 yilda Rossiyadan 5,4 milliard dollarga S-400 Triumf havo mudofaa tizimini sotib olgan. Reuters xabariga ko‘ra, ushbu tizimlardan uchtasi allaqachon yetkazib berilgan, yana ikkitasi kutilmoqda.
“Bu yil katta yetkazib berish rejalashtirilgan edi, bu amalga oshmaydi. Ruslar bizga buni taqdim eta olmasligini yozma ravishda aytishdi”, — deydi vakil.
Eslatib o‘tamiz, bu hamkorlik Hindiston harbiy-havo kuchlari Rossiya samolyotlari uchun ehtiyot qismlar yetkazib berishiga bog‘liq.
Xitoy raisi Moskvaga tashrifdan so‘ng Kiyevni kuttirmoqda
Xitoy rahbari Rossiyaga tashrifidan keyin Zelenskiy bilan gaplashishni rejalashtirayotgani ma‘lum qilingandi. 22-mart kuni Moskvaga uch kunlik tashrif yakunlangan bo‘lsa-da, biroq Kiyev suhbat o‘tkazilishi haqida Pekindan haligacha tasdiq olmadi
Xitoy Rossiya va Ukraina o‘rtasidagi kelishuv masalasini o‘z zimmasiga olmoqchimi yoki ehtiyotkorlik bilan chetga chiqadimi? Tushunishimcha, Xitoy hali buni o‘zi uchun hal qilmagan”, — deydi Ukraina prezident ofisi rahbarining maslahatchisi Mixail Podolyak.
Ayni vaziyatda AQSH rasmiylari, “Xitoy va Si Szinpinning o‘zi faqat Rossiya nuqtayi nazarini emas, balki bevosita Ukraina nuqtayi nazarini eshitishi kerak”, — deb ta’kidlamoqda.
O‘zbekistonda 6 balldan 9 ballgacha belgilangan zilzila qachon sodir bo‘ladi?
Ijtimoiy tarmoqlarda O‘zbekiston hududlarida 6 balldan 9 ballgacha zilzila kuzatilishi mumkin bo‘lgan 359 shahar ro‘yxati bilan bog‘liq xabarlar tarqalmoqda. Mazkur ro‘yxat FVV saytiga joylashtirilgan.
Tarqalayotgan xabarlar ikki xil mazmunda chop etilmoqda. Ya‘ni birinchisi, yaqin kunlarda shu baldagi zilzila sodir bo‘lishi haqida bo‘lsa, ikkinchisi buning aksi.
Gidrometeorologik ilmiy tahlillar kanali muallifi Ekin Abdulahatovning yozishicha, bu ro‘yxat O‘zbekistonning seysmik rayonlashtirish xaritasidan kelib chiqib tuzilgan va qachonlardir hududlarda shu kuchdagi zilzila bo‘lishi mumkinligini anglatadi.
Ba’zi hududlar 9 ballik seysmik faol hududlarga yaqin joylashgan bo‘lishiga qaramay, chuqur ilmiy o‘rganishlar asosida 6 ballik hudud qatoriga kiritilgan”, — deydi mutaxassis.
Ayni vaziyatda Ekin Abdulahatov aholidan xabarlarni vahima va sarosima bilan qabul qilmasliklarini so‘radi.
Izoh (0)