Toshkentda Xalqaro shaxmat akademiyasi mezbonligida o‘tgan nufuzli xalqaro musobaqa o‘z yakuniga yetdi.
Dunyoning ko‘zga ko‘ringan shaxmatchilari mukofot jamg‘armasi 75 000 AQSH dollarini tashkil etgan President Cup musobaqasi bosh sovrini uchun bahs olib bordi. Yakunda bosh sovrin Nihal Saringa nasib etdi. Hindistonlik grossmeyster chempionlik o‘yinida Nodirbek Abdusattorov bilan durang o‘ynadi va 7,5 ochko jamg‘argan holda chempionga aylandi.
O‘zbekistonlik Javohir Sindorov ikkinchi o‘rinni egalladi. U 9-tur bahsida hindistonlik Nilash Sahani taslim etdi. Agar 8-tuda Javohir Nihal Saringa yutqazmaganida aynan u turnir chempioni bo‘lardi. Saidakbar Saydaliyevdan ustun kelgan turnirning ikkinchi raqamli ishtirokchisi eronlik Parham Maghsoodloo 7 ochko bilan qo‘shimcha ko‘rsatkichlarga ko‘ra uchinchi o‘rinni band etdi.
Musobaqaning birinchi tartib raqamli shaxmatchisi Nodirbek Abdusattorov 6,5 ochko jamg‘ardi va 5-o‘rin bilan kifoyalandi. Yana bir o‘zbekiston vaki Shamsiddin Vohidov 4-o‘rinni egalladi.
Shunday qilib, hindistonlik sportchi birinchi o‘rin sohibiga beriladigan 25 ming AQSH dollarini qo‘lga kiritdi. Javohir Sindorov 15 ming AQSH dollarini qo‘lga kiritgan bo‘lsa, Eron vakili Parham 7 ming dollar bilan kifoyalandi. 4-o‘rinni egallagan Shamsiddin Vohidov 5 ming va Nodirbek Abdusattorov 4 ming dollar pul mukofotini qo‘lga kiritdi.
Izoh (0)