Ҳиндистон Россиядан мудофаа ускуналари буюртмаларини кескин қисқартирди, шу билан бирга, Ғарб мамлакатларидан қурол-яроғ сотиб олишни фаол равишда бошлади. Бу ҳақда Bloomberg хабар берди.
Қайд этилишича, 2023 йилда Ҳиндистон Россиядан жами қуролларнинг 36 фоизини сотиб олган бўлса, 2009 йилда бу кўрсаткич 76 фоизни ташкил этган.
“Бу кўп йиллардан буён руслардан қурол харид қилиб келаётган давлат сиёсатидаги кескин ўзгаришдир”, деб таъкидлайди нашр.
Журналистларнинг маълум қилишича, бундан ташқари, Ҳиндистон ҳукумати Россия билан биргаликда вертолётлар ва замонавий қирувчи самолётлар яратиш ва ишлаб чиқариш режаларини кейинга қолдирган ҳамда ҳарбийларини тайёрлаш учун сувости кемасини ижарага олмаган.
Нашрнинг аниқлик киритишича, Ҳиндистон Ғарб давлатларидан кўпроқ қурол ва хизматлар сотиб олишни бошлаган, шунингдек, АҚШ ва Франция кўмагида ўз ҳарбий қурилмаларини ишлаб чиқаришни йўлга қўйган.
Қайд этилишича, ҳукумат Россиядан арзон энергия сотиб олишда ва Россия президенти Владимир Путинга дипломатик ёрдам кўрсатишда давом этаётган бўлса-да, Ню Деҳли Москвага қарамликни камайтириш учун шундай қадамлар ташламоқда.
Ҳиндистон ва Россия милтиқ ва ракеталар ишлаб чиқариш бўйича ҳамкорликни давом эттирмоқда. Ҳиндистон, шунингдек, Россия ядро технологиясига қарамдир.
“Россия Ҳиндистонга ўзининг ядровий сувости кемаларини таклиф қилган ягона давлат бўлиб қолмоқда, чунки иккала томон ядровий муаммоларни муҳокама қилиш йўлини топмагунча, Ҳиндистоннинг Ғарб давлатлари билан ҳамкорлиги тўлиқ бўлмайди”, дейди сиёсатчилар.
Сентябрь ойида Россиядан Ҳиндистонга олмос етказиб бериш 2023 йилнинг шу даврига нисбатан 96 фоизга ёки деярли 25 бараварга камайган эди.
Изоҳ (0)