Dehli rasmiylari havoning kuchli ifloslanishi tufayli maktablarni yopdi, qurilish ishlarini to‘xtatdi va yuk mashinalarining Hindiston poytaxtiga kirishini chekladi. Bu haqida Associated Press xabar qildi.
Hozirda shaharga faqat kundalik ehtiyoj uchun zarur bo‘lgan mahsulotlar tashuvchi yuk mashinalari kiritilmoqda.
Atmosferada inson salomatligiga zararli zarrachalar ko‘p bo‘lgani sababli hukumat vakillari bolalar, qariyalar va surunkali nafas yo‘llari kasalliklariga chalingan fuqarolarni uyda qolishga chaqirdi.
Bundan tashqari, aviakompaniyalar ko‘rish imkoniyati yomonligi sababli parvozlar kechikishi haqida ogohlantirgan.
Hindiston poytaxtining ayrim hududlarida havoning ifloslanish darajasi Jahon sog‘liqni saqlash tashkiloti tomonidan ruxsat etilgan me’yordan 50 baravar yuqori.
Dehli aholisi ijtimoiy tarmoqlarda bosh og‘rig‘i va quruq yo‘taldan shikoyat qilmoqda, deb yozadi Associated Press.
14-noyabr kuni quyuq tutun tufayli Nyu-Dehlidagi Indira Gandi xalqaro aeroportida 200 dan ortiq reyslar kechiktirilgandi.
Shahar havosining ifloslanish darajasi belgilangan me’yordan 8 baravar oshib ketgan.
Har yili noyabr va dekabr oylarida Nyu-Dehlida havo sifati keskin yomonlashishi kuzatiladi. Bu poytaxt mintaqasiga qo'shni shtatlardagi o'rim-yig'imdan keyin sodir bo'ladi.
Fermerlar, taqiqlarga qaramay, tonnalab quruq o‘tlarni yoqib yuborishadi. Natijada quyuq tutun pastlikda joylashgan Nyu-Dehlini qoplaydi.
Hindistonlik olimlarning fikricha, bunday havoni yutish kuniga 50 ta sigaret chekish bilan barobar. Shifokorlar aholiga ko‘chaga chiqmaslikni, chiqishga majbur bo‘lganda, himoya niqoblaridan foydalanishni tavsiya qildi.
Izoh (0)