Jahon shaxmat federatsiyasi noyabr oyi yakunlangach, o‘z reytingini yangiladi. Ushbu yangilangan jahon reytingida kuchli 100 likdan 5 nafar o‘zbekistonlik grossmeyster o‘rin oldi.
Reytingda Nodirbek Abdusattorov (2777) 6-o‘rinda qayd etildi. U avvalgi oyda ham shu o‘rinda qayd etilgan edi. Bu oyda uning reyting ochkolarida ham o‘zgarish sezilmadi.
Bundan tashqari, eng kuchli shaxmatchilar reytingida Rustam Qosimjonov (2685) ham o‘rin olgan. Tajribali shaxmatchi 43-o‘rinda joylashgan. Javohir Sindorov (2682) avvalgi oydagi kabi 46-o‘ringa joylashdi. 2681 reyting ochkosiga ega shaxmatchi Shamsiddin Vohidov 47-o‘ringa ko‘tarildi. U oktyabr oyidagi reytingda 48-o‘rinda edi. Avvalgi oyda 62-o‘rinda qayd etilgan Nodirbek Yakubboyev (2668) bu oyda 60-o‘rinda qayd etildi. Ushbu oyda hech qaysi o‘zbek shaxmatchilari o‘z hisobiga reyting ochkolari qo‘shib qo‘ya olmadi: reytingdagi ko‘tarilish boshqa sportchilarning yo‘qotishlar hisobiga amalga oshdi.
Sentyabr oyida Nodirbek yoshlar o‘rtasidagi rasmiy reytingda birinchi o‘rinda qayd etilgan edi. Oktyabr oyi uchun e’lon qilingan reytingda u o‘rnini Hindistonlik Gukeshga bo‘shatib berdi va hanuz o‘sha o‘rinda joylashgan. Gukesh 2783 reyting ochkosi bilan yoshlar o‘rtasida yetakchilik qilmoqda. Yana bir shaxmatchi Javohir Sindorov 5-o‘rinni egallab turibdi.
Abdusattorov Hindistonning Kalkutta shahri mezbonlik qilgan Tata Steel Chess India turnirida qatnashdi. Rapid yo‘nalishida 4-o‘rinni egallagan O‘zbekistonning 1-raqamli shaxmatchisi blitzda 7-o‘rinni egalladi.
Toshkentda o‘tkazilgan Prezident Kubogida O‘zbekistonning top shaxmatchilari qatnashdi. Bosh sovrin Hindiston vakiliga nasib qilgan turnirda ikkinchi o‘rinni Javohir Sindorovga nasib qildi. Shamsiddin Vohidov musobaqaning 4-o‘rnini egallagan bo‘lsa, Nodirbek Abdusattorov kuchli beshlikdan o‘rin oldi.
Izoh (0)