Xitoy mudofaa vaziri Li Shanfu lavozimidan chetlashtirildi, unga qarshi tergov olib borilmoqda. Bu haqda razvedka ma’lumotlaridan xabardor AQSH rasmiylariga tayanib, Financial Times xabar berdi.
Oxirgi ikki hafta davomida Li Shangfu omma oldida ko‘rinish bermagan. Vazir 7—8-sentabr kunlari Vyetnam va Xitoy o‘rtasidagi mudofaa sohasidagi hamkorlik bo‘yicha yillik yig‘ilishda ishtirok etishi kerak edi. Biroq Vyetnamga safari “sog‘lig‘i sababli” bekor qilingan.
65 yoshli Li Shangfu mudofaa vaziri lavozimiga 2023-yil 12-martda kelgan. 2018-yilda u Rossiyadan Su-35 qiruvchi samolyotlari va S-400 komplekslarini sotib olgani uchun AQSH sanksiyalari ostida qolgan. Vazir etib tayinlanganidan bir oy o‘tib u Moskvaga tashrif buyurgan va u yerda Rossiya prezidenti Vladimir Putin bilan uchrashgan.
“Mudofaa vazirining iste’fosi Pekinning harbiy va tashqi siyosat idorasining elita a’zolari o‘rtasidagi tartibsizlikning yana bir belgisi bo‘lishi mumkin”, — deydi FT.
Yozda Xitoy tashqi ishlar vaziri Sin Gan uzoq vaqt ommaga ko‘rinish bermagandi. Bu uning “sog‘lig‘idagi o‘zgarishlar” bilan izohlangan. Gan iste’foga chiqqani keyinroq ma’lum bo‘lgan. U atigi olti oy tashqi ishlar vaziri lavozimida ishlagan.
Shuningdek, Xitoy yetakchisi Si Szinpin Xitoy yadroviy kuchlariga qo‘mondonlik qilgan ikki yuqori martabali zobitni — raketa qo‘shinlariga rahbarlik qilgan general Li Yuchao va uning o‘rinbosari Lyu Guanbinni lavozimidan olgan.
Ular ham ishdan olinishiga qadar bir necha oy davomida ommaga ko‘rinish bermagan.
“Yuqori martabali harbiy amaldorlar maxfiy ma’lumotlarni oshkor qilganlikda gumonlanmoqda”, — deydi anonim manba.
Shundan so‘ng Si Szinpin va Kommunistik partiya armiyadagi korrupsiyaga yo‘l qo‘yib bo‘lmasligini e’lon qilgan.
“Agar mudofaa vaziri va raketa qo‘shinlari rahbarlarining lavozimidan chetlatilishi korrupsiya bilan bog‘liq bo‘lsa, bu Si Szinpinning yuqori mansabdor shaxslarni tanlash bo‘yicha tekshiruv jarayoni chuqur noto‘g‘ri ekanini ko‘rsatadi”, — dedi Xalq armiyasi bo‘yicha markaziy razvedka boshqarmasining sobiq eksperti Dennis Uaylder.
“Menimcha, bu Si Szinpinning armiya ustidan nazoratini shubha ostiga qo‘ymaydi, lekin bu tizim qanchalik chuqur korrupsiyalashgani bo‘yicha eslatma bo‘lishi kerak”, — deb xulosa qildi Germaniya Marshall jamg‘armasining xitoylik eksperti Bonni Gleyzer.
Izoh (0)