Xitoy hukumati sobiq amaldor Li Tzayungni turli “samarasiz loyihalar” uchun 150 milliard yuandan ortiq mablag‘ni (21 milliard dollar) isrof qilganlikda aybladi. Gap 23 ta qurilish obyekti haqida ketmoqda, ulardan 16 tasi samarasiz yoki to‘xtab qolgan obyektlar ro‘yxatiga kiritilgan.
Li Tzayung Guychjou provinsiyasining Lyupanshuy shahri rahbari sifatida 2013-yildan 2017-yilgacha davlat mablag‘lari hisobidan infratuzilma loyihalarini amalga oshirgan. Jumladan, u Osiyodagi eng uzun kanat yo‘liga ega tog‘-chang‘i kurortini qurish uchun 3 milliard yuandan ortiq qarz olgan. Hozirda bu kurort qurilishi “samarasiz loyiha” sifatida to‘xtatilgan.
Yiliga ikki oydan kamroq qor yog‘adigan Lyupanshuyda yana ikkita chang‘i kurorti allaqachon tashkil etilgan bo‘lib, uchinchi bunday obyekt mablag‘ jihatidan o‘zini oqlashi qiyinligi avvalboshdan aniq edi.
Xitoy hukumati viloyatlar infratuzilma loyihalariga “o‘ylamasdan sarflangan” qarzlarni to‘lash uchun kurashayotgan bir paytda mahalliy hukumat qarzlarini qisqartirishga bir necha bor va’da bergan.
Avvalroq Xitoyda korrupsiyaga qarshi kurash doirasida bir qator hibsga olishlar amalga oshirilgandi. Xususan, 8-yanvar kuni CNPC Xitoy milliy neft korporatsiyasining sobiq bosh direktorining sobiq yordamchisi Syuy Venjun poraxo‘rlik jinoyatini sodir etishda gumonlanib hibsga olindi. Bungacha China Everbright sobiq rahbari korrupsiya uchun Xitoy Kommunistik partiyasidan chiqarib yuborilgan edi.
Izoh (0)