Xitoy Qimmatli qog‘ozlarni tartibga solish qo‘mitasining Fan va texnologiya nazorati departamentining direktori Yao Tsyan lavozimidan chetlatildi va Xitoy Kommunistik partiyasi (KKP) safidan chiqarib yuborildi. Bunga uning kriptovalyutada pora olgani sabab bo‘lgan.
Bu haqda KKP intizomni tekshirish bo‘yicha markaziy komissiyasi ma’lum qildi. Bu Xitoyda kuzatilgan birinchi shunday holat.
“Yao Tsyan asl missiyasidan yuz o‘girgan, havoyi shon-shuhratga intilgan, o‘zini moliyaviy texnologiyalar sohasida mutaxassis deb hisoblagan va shaxsiy manfaatlar uchun maʼlum xizmat ko‘rsatuvchi provayderlarni qo‘llab-quvvatlagan”, deyiladi kuzatuv saytida eʼlon qilingan bayonotda.
Tekshiruv natijalariga ko‘ra, u o‘z nazorati va mansab vakolatlarini suiisteʼmol qilgani, tadbirkorlik faoliyatini amalga oshirishda, dasturiy-texnik vositalarni xarid qilishda tashkilotlarga tegishli bo‘lmagan foyda olishga yordam bergani, shuningdek, virtual valyutalarda pora olgani aniqlandi.
Uning ishi qo‘shimcha tekshirish va jinoiy javobgarlikka tortish uchun prokuraturaga o‘tkazildi.
So‘nggi oylarda Bitkoin dunyo moliya bozorlarida shov-shuv ko‘tardi. Uning narxi deyarli 100,000 dollarga yaqinlashib, uni yana bir bor diqqat markaziga olib chiqdi.
Bitkoin bozor kapitallashuvi bo‘yicha eng qimmat aktivlar reytingida kumushdan o‘zib ketdi.
Ayni paytda kriptovalyutaning bozor kapitali 1,76 trln dollardan oshadi.
“Daryo” saytida bitkoinning narxi keskin ko‘tarilishiga sabab bo‘lgan omillar haqida material e’lon qilingan.
Izoh (0)