Хитой Ташқи ишлар вазирлиги мамлакат мудофаа вазири Дун Сзюн коррупцияда гумон қилиниб, унга нисбатан тергов ўтказилаётгани ҳақидаги хабарларни асоссиз деб атади. Бу ҳақда аввалроқ Financial Times (FТ) номи ошкор этилмаган расмийларга таяниб хабар берган эди.
Хитой Ташқи ишлар вазирлиги матбуот котиби Мао Нингнинг айтишича, тергов ҳақидаги хабарлар “соя ортидан қувишдир”. Унинг сўзларини South China Morning Post нашри келтирган.
Financial Times нашри исми ошкор этилмаган манбага таяниб Дун Сзюн Хитой армиясидаги коррупция иши доирасида тергов қилинаётганини хабар берганди. Мудофаа вазири сифатида ишлаган аввалги икки амалдор ҳам худди шундай жиноятда айбланган.
Дун Сзюн 2023 йил декабридан буён Хитой мудофаа вазирлигини бошқариб келмоқда. Илгари бу лавозимни эгаллаб келган Ли Шангфу бор-йўғи етти ойлик фаолиятидан сўнг ишдан бўшатилганди.
Июнь ойида Хитой Коммунистик партияси марказий қўмитаси Сиёсий бюроси Ли Шанфуни ўз мансаб мавқеидан шахсий манфаати йўлида фойдаланиб, пора олганликда айблаб, уни партиядан чиқариб юборган эди. Ундан аввалги мудофаа вазири Вей Фенхе ҳам қонун ва партия интизомини бузгани учун Хитой Коммунистик партиясидан чиқариб юборилган.
Аввалроқ Хитойда криптовалютада пора олган амалдор — Қимматли қоғозларни тартибга солиш қўмитасининг Фан ва технология назорати департаментининг директори Яо Цян коммунистик партиядан ўчирилгани хабар қилинган.
“Яо Цян асл миссиясидан юз ўгирган, ҳавойи шон-шуҳратга интилган, ўзини молиявий технологиялар соҳасида мутахассис деб ҳисоблаган ва шахсий манфаатлар учун маълум хизмат кўрсатувчи провайдерларни қўллаб-қувватлаган”, дейилади Коммунистик партия эълон қилган баёнотда.
Изоҳ (0)