Yevrokomissiya prezidenti Ursula fon der Lyayen Yevropa xavfsizligini mustahkamlash va xalqaro ishlarda faollashishga chaqirdi. Bu haqda u Yevroparlamentda Yevropa komissiyasi aʼzoligiga nomzodlar taqdimotida aytib o‘tdi.
“Xavfsizligimizni mustahkamlash bugungidek ziddiyatli va mo‘rt dunyoda muhim bo‘lib bormoqda. Yevropaning bu holatdagi o‘rni har qachongidan ham zarurroq”, dedi u.
Ursula fon der Lyayen ko‘p tomonlama aloqalar va sheriklik, barqaror rivojlanish va gumanitar yordam, xavfsizlik va inson huquqlarini Yevropa ittifoqi tashqi siyosatida yo‘naltirilishi kerak bo‘lgan sohalar deb atadi.
“Bu bizning yetakchilik rolimizda juda ko'p mehnat va tinimsiz sa'y-harakatlarni talab qiladi. Men Kaya Kallasga oliy vakilimiz va Yevropa komissiyasi prezident o'rinbosari sifatida ishonishimiz mumkinligini bilaman. U Yevropa diplomatiyasi va manfaatlari uchun to'g'ri vaqtdagi to'g'ri odam”, dedi fon der Lyayen.
Kaya Kallas 2021—2024-yillarda Estoniya bosh vaziri sifatida faoliyat yuritgan. Yevropa parlamenti va Estoniya parlamentining sobiq a'zosi hisoblanadi. U dekabr oyida Josep Borrelning o‘rnini egallaydi.
Yangi Yevropa komissiyasiga nomzodlar qatorida Yevropa ittifoqining farovonlik va sanoat strategiyasi bo‘yicha bo‘lajak vitse-prezidenti Stefan Sejurne, texnologik suverenitet, xavfsizlik va demokratiya bo‘yicha vitse-prezidentlar Xenna Virkunnen hamda Yashil, adolatli va raqobatbardosh o‘tish bo‘yicha Riber Teresa, Yevrokomissiyaning ishchi kuchi, ko‘nikma va tayyorgarlik masalalari bo‘yicha vitse-prezidenti Roksana Minzatu, birdamlik va islohotlar bo‘yicha vitse-prezident Rafael Fittolar bor.
Marosh Shefchovich savdo va iqtisodiy xavfsizlik bo‘yicha, Valdis Dombrovskis iqtisodiyot va samaradorlik bo‘yicha, Oliver Varhelli sog‘liqni saqlash bo‘yicha yevrokomissar lavozimlarini egallaydi.
Belgiyaning sobiq tashqi ishlar vaziri Aja Labib inqirozlarni boshqarish bo‘yicha Yevropa komissari lavozimiga, Rossiyaga qarshi kayfiyati bilan tanilgan Yevroparlament deputati Andrius Kubilius esa Mudofaa va koinot bo‘yicha Yevropa komissarligiga tayinlanadi.
Izoh (0)