Oybek Shaxavdinov O‘zbekistonning Chernogoriyadagi birinchi elchisi etib tayinlandi. Bu haqda “Dunyo” axborot agentligi xabar berdi.
Ma’lum qilinishicha, u 25-noyabr kuni Chernogoriya prezidenti Yakov Milatovichga ishonch yorliqlarini topshirdi. Prezident qarorgohida bo‘lib o‘tgan tantanali marosimdan so‘ng o‘tkazilgan muloqotda O‘zbekiston-Chernogoriya munosabatlarining bugungi holati va istiqbollari, ularni yangi sifat bosqichiga olib chiqish bo‘yicha vazifalar muhokama qilindi.
Yakov Milatovich O‘zbekiston xalqini ijtimoiy-iqtisodiy taraqqiyot yo‘lida erishilgan muvaffaqiyatlar bilan tabriklab, O‘zbekistonga tinchlik, taraqqiyot va farovonlik tiladi. Chernogoriya rahbari, shuningdek, Shavkat Mirziyoyevning islohotlar va xalqaro hamkorlikni mustahkamlash borasidagi tashabbuslari muhimligini taʼkidladi.
Chernogoriya ikki tomonlama munosabatlar, xususan, savdo-iqtisodiy, investitsiyaviy va madaniy sohalardagi salohiyatni yuqori baholaydi. Prezident sayyohlik va gumanitar almashinuvlar uchun qulay sharoitlar yaratish muhimligini taʼkidladi.
O‘zbekiston va Chernogoriya o‘rtasidagi diplomatik munosabatlar 2006-yil 19-dekabr kuni o‘rnatilgan.
Oybek Shaxavdinov haqida
U ikki tomonlama munosabatlar tarixida O‘zbekistonning Sloveniyadagi, 23-oktabr kuni Xorvatiyadagi birinchi elchisi bo‘ldi. U 2024-yil mart oyida O‘zbekistonning Vengriyadagi elchisi lavozimiga tayinlangan.
Oybek Shaxavdinov Birmingem universiteti (Buyuk Britaniya), Toshkent davlat yuridik universiteti (magistratura), Moskva davlat xalqaro munosabatlar institutining (MDXMI) tarjimonlar tayyorlash kursini tamomlagan.
Diplomat 2004-yildan buyon TIV tizimida. Mehnat faoliyatini Toshkentdagi Jahon iqtisodiyoti va diplomatiya universitetida boshlagan, so‘ngra TIVning Yevropa davlatlari bilan hamkorlik boshqarmasida referentlikdan boshqarma boshlig‘i singari diplomatik xizmatning barcha bosqichlarini bosib o‘tgan. O‘zbekistonning Bryusseldagi elchixonasida ham ishlagan.
Izoh (0)