Josep Borrelning aytishicha, u Yevropa diplomatiyasi rahbari bo‘lgan davrda Yevropa ittifoqi (YI) “faqat tijoriy emas, balki geosiyosiy o‘yinchiga aylanish” uchun muhim qadamlar qo‘ygan. U Rossiyaga qarshi 14 ta sanksiyalar to‘plami joriy etilganini o‘zining yutuqlari qatoriga kiritishini ma’lum qildi.
“Biz Putinning jangovar mashinasini jazolash uchun 14 ta sanksiya paketini ma’qulladik va u urush qilayotgan mamlakatga harbiy yordam ko‘rsatdik... Inqirozli vaziyatlarga ta’sir ko‘rsatish imkoniyatimizni ishga solib, Yevropa qo‘mondonligi ostida 5000 askarni tezkor joylashtirish masalasini ma’qulladik”, deya o‘z yutuqlarini sanab o‘tdi u Ispaniyaning “20 minutos” gazetasiga bergan intervyusida.
Yevropa ittifoqi iyun oyida Rossiyaga qarshi sanksiyalarning 14-paketini qabul qilgandi.
Shuningdek, Josep Borrell sentyabr oyida Rossiyani qo‘llab-quvvatlayotgani uchun Eronga qarshi yangi sanksiyalar joriy etishga va’da bergandi.
Dekabrdan boshlab Josep Borrell o‘rnini Estoniya sobiq bosh vaziri Kaya Kallas egallaydi. Uning nomzodi yoz boshida Yevropa ittifoqi sammitida tasdiqlangan. Yevrokomissiya rahbari Ursula fon der Lyayen ikkinchi muddatga, Portugaliyaning sobiq bosh vaziri Antonio Kosto esa Sharl Mishel o‘rniga Yevropa kengashi prezidenti etib saylandi.
Kaya Kallas o‘z chiqishida NATO Ukrainaning urushdagi g‘alabasini asosiy maqsadi sifatida belgilashi kerakligini aytgandi.
Izoh (0)