Yevropa komissiyasi Prezidenti Ursula fon der Lyayenning “O‘zbekistonda Yevropa iqtisodiyoti kunlar” biznes-forumining ochilish marosimida ishtirokchilarga videomurojaat yo‘lladi.
Murojaatda u so‘nggi yillarda O‘zbekiston va Yevropa ilgari misli ko‘rilmagan darajada bir-biriga yaqinlashganini ta’kidladi.
“Asrlar davomida O‘zbekiston global savdoning ‘urib turgan yuragi’ bo‘lib kelgan. Yevropalik savdogarlar kiyim-kechak va kulolchilik buyumlarini xarid qilish uchun Samarqand, Buxoro va Xivaga kelishgan.
Ular sizning hashamatli saroylaringiz, maftunkor manzaralaringiz va g‘oyat rang-barang madaniyatingiz haqidagi hikoyalar bilan qaytishgan.
Bugun O‘zbekiston yana dunyoga ochilmoqchi. Siz nafaqat Osiyoda, balki global savdo yo‘nalishlari va investitsiya oqimlarida ham o‘z markaziy o‘rningizni qaytarmoqchisiz.
Yevropa esa O‘zbekistonning ming yillik tarixidagi ushbu yangi bobda sizning hamkoringiz bo‘lishni istaydi.
So‘nggi yillarda O‘zbekiston va Yevropa ilgari misli ko‘rilmagan darajada bir-biriga yaqinlashdi. Hech bo‘lmaganda uchta misol keltirmoqchiman:
Birinchisi — savdoga taalluqli. 2021 yildan boshlab biz o‘zbek mahsulotlari uchun Yevropa bozorini ochdik. O‘zbekiston eksporti, xususan, to‘qimachilik va metallurgiya sohasida jadal sur’atlar bilan o‘sdi.
Yanada o‘sish uchun ulkan salohiyat mavjud.
Ikkinchisi – investitsiyalar sohasida. "Global darvoza" dasturimiz orqali biz sizning dunyo bilan o‘zaro bog‘liq bo‘lish maqsadingizni qo‘llab-quvvatlaymiz. Xalqaro sheriklarimiz bilan birgalikda Yevropadan Sharqiy Osiyoga eng qisqa va xavfsiz yo‘nalish bo‘lgan Transkaspiy yo‘lagiga 10 milliard yevrogacha investitsiya kirityapmiz. U Yevropa va Markaziy Osiyoni 15 kundan kamroq vaqt ichida bog‘lashga imkon beradi.
Shuningdek, mamlakatingizning eng chekka hududlariga eng zamonaviy raqamli aloqani yetkazib berish uchun O‘zbekistonni sun’iy yo‘ldosh tarmog‘imizga ulash ustida ishlamoqdamiz.
O‘zbekiston qit’alarimiz chorrahasida joylashgan va global aloqalarimiz markazida bo‘lishi lozim.
Uchinchi misolim – biz strategik sohalardagi hamkorligimizni kengaytirmoqdamiz. Joriy yilning aprel oyida muhim minerallarni yetkazib berish zanjiri to‘g‘risida bitim imzoladik.
Ba’zi investorlar faqat xomashyo qazib olishdan manfaatdor ekanini bilamiz, lekin biz unday emasmiz. Biz eng yuqori standartlar asosida mahalliy aholi uchun ish o‘rinlari va qo‘shilgan qiymatga ega mahalliy ishlab chiqarishlarni yaratishni qo‘llab-quvvatlamoqchimiz.
Chunki bu yanada barqaror ta’minot zanjirini yaratishning eng yaxshi usuli hisoblanadi.
Ushbu iqtisodiy forum kompaniyalarimiz o‘rtasida yangi aloqalarni o‘rnatishga xizmat qiladi, shuningdek, yangi kelishuvlarni yangi ishbilarmonlik imkoniyatlariga aylantiradi, deb umid qilaman.
Bularning barchasi faqat boshlanishi. Tez orada O‘zbekiston va Yevropa o‘rtasida investitsiya va savdoni yanada ko‘paytiradigan yangi Kengaytirilgan sheriklik va hamkorlik to‘g‘risidagi bitimni imzolaymiz", — dedi Ursula fon der Lyayen.
Shuningdek, u kelgusi yili Samarqand shahrida tarixda ilk bor o‘tkaziladigan “Markaziy Osiyo - Yevropa Ittifoqi” sammitini sabrsizlik bilan kutayotganini ham ta’kidladi.
“O‘zbekiston va Yevropa Ittifoqi o‘rtasida diplomatik munosabatlar o‘rnatilganining 30 yilligi nishonlanayotgan shu paytda bir narsaga aminman: sherikligimizning eng yaxshi kunlari hali oldinda!
Xullas, barchangizga Toshkent shahriga tashrif xayrli bo‘lishini tilayman”, dedi u.
Izoh (0)