Франциянинг Паре-ле-Мониал коммунасидаги музейдан қуролланган шахслар миллий бойлик сифатида тан олинган заргарлик буюмларининг бир қисмини ўғирлаб кетди. Мазкур заргарлик буюмларининг тахминий нархи 7 миллион еврони ташкил қилади.
Бу ҳақда AFP хабар бермоқда.
Коммуна мери Жан-Марк Несменинг сўзларига кўра, 1904 йилда парижлик заргар Жозеф Хомет томонидан яратилган, Гиeрон музейининг асосий экспонати бўлган Виа Витаe (лотинча “ҳаёт йўли”) буюмлари ўғирланган. Композиция олмос ва бошқа қимматбаҳо тошлар, мармар, олтин ва фил суягидан ясалган элементлар билан безатилган 138 та фигурадан иборат.
Заргарлик буюмларининг ўғирланиши 21 ноябрь куни тушдан кейин содир бўлган. Талончиликни тўрт киши амалга оширган. Аввалига улар ҳавога ўқ узган, сўнг заргарлик буюмлари сақланадиган ойнали жавонга ўқ отиб, уни тешган.
У ердан олтин ва фил суягидан ясалган ҳайкалчаларни, шунингдек, зумрад билан безатилган тақинчоқларни олиб, мототциклларига ўтириб қочиб кетишган.
“Бу Паре-ле-Мониал ва мамлакат мероси учун катта йўқотиш”, деди мер агентликка.
Ўғирлик вақтида музейда 20 га яқин ташриф буюрувчилар ва муассаса ходимлари бўлган, улар жабрланмаган.
Ҳозирда талончиларни аниқлаш ва уларни қўлга олиш ҳаракатлари амалга оширилмоқда.
Жорий йилнинг август ойида ижтимоий тармоқларда Ўзбекистон давлат санъат музейининг таъмир учун ёпилиши ортидан қимматбаҳо асарларнинг сотуви бошлангани айтилган хабарлар тарқалганди.
Манзарачи рассом, рангтасвир устаси Ўрол Тансиқбоев муаллифлигидаги сурат тармоқларда 756 миллион сўмга баҳоланган бўлса, италиялик рассом асари 37 миллионга сотилиши мумкинлиги маълум қилинган.
Маданий мерос агентлиги ҳолатга изоҳ берар экан, “музей таъмири ва суратларнинг сотувга чиқиши ўртасида боғлиқлик йўқ”лигини маълум қилган.
Изоҳ (0)