G‘arb davlatlari 2025-yildan boshlab Rossiyani 4-avlod yadroviy reaktorlarini rivojlantirish bo‘yicha xalqaro loyihadan chetlatishni rejalashtirmoqda. Bu haqda Buyuk Britaniya energiya xavfsizligi va uglerod neytralligi departamenti bayonotida aytiladi.
“Generation IV xalqaro forumi yadroviy xavfsizlik standartlarini hurmat qilishga tayyor tomonlar o‘rtasidagi kelajakdagi hamkorlikni ta’minlash uchun Rossiyani o‘z yig‘ilishlariga jalb qilmaydi”, deyiladi xabarda.
Bayonotda Bokuda bo‘lib o‘tgan BMTning iqlim o‘zgarishi bo‘yicha doiraviy konvensiyasi (COP29) ishtirokchilarining 29-konferensiyasi doirasida Buyuk Britaniya energetika xavfsizligi va uglerod neytralligi vaziri Ed Miliband va AQSH energetika vaziri o‘rinbosari Devid Tyork 2025-yil 1-martdan kuchga kiradigan yadroviy tadqiqotlar va ishlanmalar sohasidagi hamkorlik to‘g‘risida kelishuv imzolagani taʼkidlangan.
London Avstraliya, Atom energiyasi bo‘yicha Yevropa hamjamiyati, Kanada, Xitoy, Koreya Respublikasi, Fransiya, Shveysariya, Janubiy Afrika va Yaponiya ham yangi shartnomaga qo‘shilishiga umid bildirdi.
4-avlod yadro reaktorlarini ishlab chiqish bo‘yicha xalqaro loyiha 2000-yilda Qo‘shma Shtatlar tashabbusi bilan boshlangan. Forum ishi doirasida hozirda rivojlanish uchun istiqbolli deb hisoblangan oltita reaktor texnologiyasi aniqlangan: gaz bilan sovitilgan tez reaktor, qo‘rg‘oshin bilan sovitilgan tez reaktor, erigan tuz reaktori, natriy bilan sovitilgan tez reaktor, suv bilan sovitilgan o‘ta kritik reaktor va yuqori haroratli gaz bilan sovitilgan reaktorlar.
Avvalroq Rossiya prezidenti Vladimir Putin yadro triadasi mamlakat suvereniteti va xavfsizligining ishonchli kafolati ekanini aytib o‘tgandi.
“Aynan yadro triadasi mamlakatimiz suvereniteti va xavfsizligining ishonchli kafolati bo‘lib qolayotganini yaxshi tushunamiz. U global barqarorlikning obyektiv fakti sifatida strategik to‘xtatib turish muammolarini hal qilish, shuningdek, yadro pariteti va dunyodagi kuchlar muvozanatini saqlash imkonini beradi”, degan Putin yadroviy to‘siq bo‘yicha mashg‘ulotlar chog‘ida.
- Klassik “yadro triadasi” quruqlik, dengiz va havo komponentlaridan iborat. Hozir (1991-yildan beri) barcha yadroviy davlatlar ichida faqat AQSH va Rossiya yadroviy triadaga ega.
Izoh (0)