AQSH mudofaa vazirining Rossiya, Ukraina va Yevrosiyo masalalari bo‘yicha yordamchisi o‘rinbosari Lora Kuper aytishicha, Rossiya hukumati tomonidan e’lon qilingan vaqtinchalik o‘t ochishni to‘xtatish rejimiga qaramasdan, Ukrainada jangovar harakatlar davom etgan.
“Rossiya prezidenti Vladimir Putinning o‘t ochishni to‘xtatish haqidagi bayonotiga kelsak, aytishim mumkinki, bugungi kunda Ukrainada janglar davom etmoqda, biz rasman o‘t ochishni to‘xtatish rejimida turgan bo‘lsak ham”, — dedi Pentagon vakili.
Lora Kuper Putinning vaqtinchalik o‘t ochishni to‘xtatish rejimi haqidagi bayonotiga biroz shubha bilan qarashni so‘radi. “Xuddi shu odamning o‘zi Ukrainaga bostirib kirmasligini aytgandi”, — dedi u.
“Rojdestvo sulhi” haqida e’lon qilinganiga qaramay, Rossiya qo‘shinlari Ukrainada jangovar harakatlarni davom ettirgani haqida Lugansk viloyati ma’muriyati rahbari Sergey Gayday ham ma’lum qildi.
Ukraina qurolli kuchlari Bosh shtabi tomonidan 7-yanvar kuni ertalab e’lon qilingan ma’lumotda aytilishicha, 6-yanvar kuni Rossiya qo‘shinlari bir marta raketa zarbasi berib, baravariga o‘t ochish reaktiv tizimida 20 marta o‘q uzgan.
Avvalroq Putinning Rojdestvo munosabati bilan o‘t ochishni to‘xtatish rejimi haqidagi g‘oyasi unga nisbatan norozilikni kuchaytirgani va tanqidlarga sabab bo‘lgani xabar berilgandi.
Rojdestvo sulhi
Rossiya prezidenti Vladimir Putin 6-yanvar soat 12:00 dan 7-yanvar kuni soat 24:00 ga qadar Ukrainadagi barcha to‘qnashuv chizig‘i bo‘ylab o‘t ochishni to‘xtatishni buyurgan. Mazkur qaror pravoslavlarning cherkovga borishi uchun qabul qilingan. Moskva Kiyevni ham o‘t ochishni to‘xtatishga chaqirgan.
Ukraina prezidenti Vladimir Zelenskiy Rossiya Rojdestvo bayramini niqob qilib, rus harbiylariga jihozlar, o‘q-dorilar yetkazib berish, safarbarlarni pozitsiyalarga yaqinlashtirishni ko‘zlaganini aytdi. Prezident ofisi rahbari maslahatchisi Mixail Podolyak Rossiya taklifini ikkiyuzlamachilik deb atadi. U sulhga rozi bo‘lish uchun Rossiya bajarishi kerak bo‘lgan ikkita shartni aytdi.
Ukraina Milliy xavfsizlik va mudofaa kengashi kotibi Aleksey Danilov ham sulh bo‘yicha o‘z fikrini bildirdi. U Rossiya bilan “Rojdestvo sulhi” bo‘yicha hech qanday muzokara olib borilmasligi, “tajovuzkor davlat” Ukraina hududini tark etishi kerakligini aytdi.
Izoh (0)