Ukraina qurolli kuchlarida bor-yo‘g‘i 50 ta ATACMS taktik raketalari mavjud, deb yozadi Britaniyaning Times nashri.
“Pentagon hech qanday ma’lumot bermagan bo‘lsa-da, Kiyev hukumatida hozirda bor-yo‘g‘i 50 ta raketa borligi taxmin qilinmoqda. Ukrainada ularni uchirish uchun HIMARS va MLRS raketa tashuvchi qurilmalari yetarli darajada”, deya ta’kidlaydi nashr.
Vashingtondagi Urushni o‘rganish instituti ma’lumotlariga ko‘ra, 300 km masofaga uchadigan ATACMS raketalari havo bazalaridan tortib o‘q-dorilar omborlarigacha bo‘lgan 245 ga yaqin Rossiya harbiy obyektlariga tahdid solishi mumkin.
Ayni paytda Pentagon matbuot kotibi Sabrina Singx AQSh prezidenti Jo Bayden Ukrainaga Rossiya hududiga zarba berish uchun Amerika raketalaridan foydalanishga ruxsat bergani haqidagi ma’lumotni tasdiqlashdan bosh tortdi.
Singx, shuningdek, Rossiya Mudofaa vazirligining bir kun avval Bryansk viloyati uzra ATACMS raketalari urib tushirilgani haqidagi xabariga izoh berishni ham istamadi.
Rossiya Mudofaa vazirligi 19-noyabrga o‘tar kechasi Ukraina Bryansk viloyatidagi harbiy obyektga ATACMS bilan hujum qilganini ma’lum qilgandi.
“Ukraina Qurolli kuchlari Bryansk viloyatidagi harbiy obyektga oltita uzoq masofali ATACMS raketalari bilan hujum qildi”, deyiladi Rossiya Mudofaa vazirligi xabarida.
Avvalroq Rossiya prezidenti matbuot kotibi Dmitriy Peskov Kiyevga Amerika qurollari bilan Rossiyaning hududiga zarba berishga ruxsat berish, keskinlikning sifat jihatidan yangi bosqichini va Vashingtonning Ukrainadagi mojarodagi ishtiroki darajasini ko‘rsatishini aytgan edi.
2023-yilning kuzida Oq uy Milliy xavfsizlik kengashi matbuot kotibi Adrien Uotson Qo'shma Shtatlar ATACMS raketalarini Ukrainaga topshirganini ilk bor e'lon qilgandi. Uning so‘zlariga ko‘ra, ATACMS raketalarining maksimal masofasi taxminan 305 km.
18-noyabr kuni The New York Times (NYT) manbalariga tayanib, AQSh prezidenti Jo Bayden Ukraina harbiylariga Rossiya hududiga zarba berish uchun ATACMS raketalaridan foydalanishga ruxsat bergani haqida xabar qilgandi.
ATACMS — uzoq masofaga zarba beruvchi boshqariladigan raketa bo‘lib, u qo‘mondonlarga jangovar maydonni shakllantirish uchun zudlik bilan o‘t ochish imkonini beradi. U og‘irligi 500 funt bo‘lgan WDU18 toifasidagi fragmentar-fugasli jangovar kallak bilan jihozlangan. Maksimal uchish masofasi 300 kilometrni tashkil qiladi. ATACMS 1980-yillarda ishlab chiqilgan va birinchi marta 1991-yilda Fors ko‘rfazi urushi paytida ishlatilgan. O‘shandan beri u turli qurolli mojarolarda, jumladan, Iroq urushi va Rossiya—Ukraina urushida faol ishlatilgan.
Izoh (0)