AQSH prezidenti lavozimiga qayta saylanishga intilayotgan Donald Tramp Respublikachilar partiyasidan davlat rahbari lavozimiga ko‘rsatilgan nomzodni qabul qildi va shu tariqa rasmiy nomzodga aylandi.
18-iyul kuni Viskonsin shtatida bo‘lib o‘tgan Respublikachilar partiyasining Milliy qurultoyida nutq so‘zlagan Tramp Amerikaning yarmini emas, balki butun Amerika prezidenti bo‘lishni xohlashini aytgan.
Tramp “mamlakatni vayron qilayotgan” AQSHning amaldagi prezidenti Jo Baydenni keskin tanqid qilib, xalqni yaqinlashib kelayotgan halokatdan faqat uning o‘zi qutqarishga qodir ekanini ta’kidlagan. Tramp unga qarshi qo‘zg‘atilgan jinoiy ishlarni demokratik fitnaning bir qismi deb atagan.
Rossiya-Ukraina urushi, G‘azodagi urush va Amerika qo‘shinlarining Afg‘onistondan tartibsiz olib chiqilishi kabi mavzular Tramp nutqida muhim o‘rin egallagan. Sobiq prezident dunyoning xaos holatidagi rasmini chizib, bularning barchasida Jo Baydenni aybdor deb atagan. Uning so‘zlariga ko‘ra, aynan Bayden AQSHning jahon sahnasidagi pozitsiyasini zaiflashtirgan.
“Agar hokimiyatda bo‘lganimda, dunyodagi mavjud barcha yirik inqirozlar yuz bermagan bo‘lardi. Men bu maʼmuriyat yaratgan har bir xalqaro inqirozni, jumladan, Rossiyaning Ukraina bilan olib borgan dahshatli urushini to‘xtataman”, deya ta’kidlagan va ularni bartaraf etishga va’da bergan.
Tramp Ukrainadagi urushni qanday to‘xtatishi haqida batafsil ma’lumot bermagan va faqat “bir telefon qo‘ng‘irog‘i bilan urushlarni to‘xtatishi” mumkinligini aytgan.
G‘azo sektoridagi urush haqida gapirar ekan, sobiq prezident Isroilga yordamni kengaytirishga va’da bermagan.
Izoh (0)