Ukrainadagi urushni tugatish bo‘yicha o‘z rejasini taklif qilgan Xitoy agressorni jabrlanuvchidan farqlamayapti, dedi Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel.
“Bu chinakam tinchlik rejasi emas va u asosan Xitoyning hammaga ma’lum pozitsiyalarini takrorlaydi. Albatta, biz buni o‘rganib chiqmoqdamiz, lekin asosiy muammo shundaki, bu reja agressor va jabrlanuvchini farqlamaydi, ularni tenglashtiradi”, — dedi Borrel.
Ukrainada urush boshlanganining bir yilligi munosabati bilan Pekin 12 banddan iborat “tinchlik rejasi”ni e’lon qilgandi. Unda Xitoy tomoni, xususan, barcha davlatlarning suvereniteti va hududiy yaxlitligini hurmat qilishni, sovuq urush mentalitetidan voz kechishni, harbiy harakatlarni to‘xtatishni, muzokaralarni qayta boshlashni va bir tomonlama sanksiyalarni bekor qilishni taklif qilgan.
Rossiya Tashqi ishlar vazirligi “xitoylik do‘stlarining Ukrainadagi mojaroni tinch yo‘l bilan hal qilishga hissa qo‘shishga bo‘lgan samimiy istagini” qadrlashini bildirdi. Ukraina prezidenti Vladimir Zelenskiy Pekin takliflarini tinchlik rejasi sifatida ko‘rmadi. “Menimcha, Xitoy bu borada o‘z fikrlarini bildirganga o‘xshaydi”, — dedi Ukraina rahbari. “Xitoy mojaro haqida gapira boshlagani yaxshi, boshqa savol esa — bu so‘zlar ortida nima bor?”
AQSH prezidenti Jo Bayden Xitoyning tinchlik rejasini faqat Rossiya uchun foydali deb atadi. Germaniya kansleri Olaf Shols takliflarda Rossiya qo‘shinlarini Ukrainadan olib chiqish bandi yo‘qligiga e’tibor qaratdi.
Izoh (0)