“Daryo” nashri 27-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Qrimdan boshlangan mojaro Qrimning qaytarilishi bilan yakunlanadimi?
Ukraina prezidenti o‘z sahifasida 2014-yilda Qrim parlamenti binosi yonida bo‘lib o‘tgan mitingga bag‘ishlab xabar joylashtirdi.
“Rossiya agressiyasi to‘qqiz yil avval Qrimdan boshlangandi. Qrimni qaytarish orqali biz tinchlikni tiklaymiz. Qrim ozod bo‘ladi!” — deyiladi Zelenskiyning postida.
2014-yilning 26-fevralida rossiyaparast va ukrainaparast faollar Simferopoldagi parlament binosi yaqinida keng ko‘lamli mitingga to‘planishgan. Ikkinchi guruhga qrim-tatar xalq majlisi boshchilik qilgan. Miting ishtirokchilari o‘rtasida to‘qnashuvlar bo‘lib o‘tib, o‘ttizga yaqin kishi yaralangan, ikki kishi halok bo‘lgan. Mana shu aksiyadan bir oy o‘tmay, Rossiya Qrimni anneksiya qildi.
Qurollarni tarqatmaslik shartnomasining to‘xtatilishi ortidan yangi harbiy mashg’ulotlar e’lon qilindi.
Hozirda bir qator ukrainalik harbiylar va g‘arb ekspertlari Ukraina 2023-yil davomida Qrimni ozod qila oladi, deb hisoblamoqda. Biroq bunga erishish uchun G'arb davlatlari Ukraina Qurolli kuchlariga kerakli barcha qurollarni yetkazib berishlari zarurligi ta’kidlanadi.
Eslatib o‘tamiz ayni vaziyatda Vladimir Putin Rossiyaning Strategik hujum qurollarini tarqatmaslik to‘g‘risidagi shartnomadagi ishtirokini to‘xtatgan.
Ushbu jarayonda Germaniya Putinga signal sifatida AQSH va Polsha bilan harbiy mashg‘ulotlar o‘tkazishini e’lon qildi
Xitoyning “tinchlik rejasi” qanday maqsadni ko‘zlagan, Xitoy va Tayvan o‘rtasidagi harbiy mojaro shubha ostida
Ukrainada urush boshlanganining bir yilligi munosabati bilan Pekin 12 banddan iborat “tinchlik rejasi”ni e’lon qilgandi. Unda Xitoy tomoni, xususan, barcha davlatlarning suvereniteti va hududiy yaxlitligini hurmat qilish, sovuq urush mentalitetidan voz kechish, harbiy harakatlarni to‘xtatib muzokaralarni qayta boshlashni va bir tomonlama sanksiyalarni bekor qilish takliflarini bergan.
Shundan so‘ng, Rossiya Tashqi ishlar vazirligi “xitoylik do‘stlarining Ukrainadagi mojaroni tinch yo‘l bilan hal qilishga hissa qo‘shishga bo‘lgan samimiy istagini” qadrlashini bildirdi. Ukraina prezidenti Vladimir Zelenskiy Pekin takliflarini tinchlik rejasi sifatida ko‘rmadi. “Menimcha, Xitoy bu borada o‘z fikrlarini bildirganga o‘xshaydi”, — degan Ukraina rahbari. “Xitoy mojaro haqida gapira boshlagani yaxshi, boshqa savol esa — bu so‘zlar ortida nima bor?”
AQSH prezidenti Jo Bayden Xitoyning tinchlik rejasini faqat Rossiya uchun foydali deb atadi. Germaniya kansleri Olaf Shols esa takliflarda Rossiya qo‘shinlarini Ukrainadan olib chiqish bandi yo‘qligiga e’tibor qaratgan.
Ayni vaziyatda Rossiyaning Ukrainadagi tajribasini hisobga olgan holda, Xitoy yetakchisi Tayvanga bostirib kirish rejasini amalga oshirish mumkinligiga shubha qilmoqda. Bu haqda AQSH Markaziy razvedka boshqarmasi (MRB) direktori Uilyam Berns CBS telekanalidagi intervyusida aytdi.
“Rossiya prezidenti Vladimir Putinning Ukrainadagi tajribasini Si Szinpinchalik diqqat bilan kuzatayotgan xorijiy yetakchi yo‘q”, — dedi Berns.
Uning so‘zlariga ko‘ra, Xitoy rahbarining Tayvan ustidan yakuniy nazoratni qo‘lga kiritish haqidagi ambitsiyalari juda jiddiy qabul qilinishi kerak, ammo “bu harbiy mojaro hozircha muqarrar degani emas”.
O‘zbekistonlik xalqaro yuk tashuvchilar Transport vazirligi tomonidan ogohlantirildi
O‘zbekiston Transport vazirligi Belarus orqali Polshaga avtotransportda xalqaro yuk tashish faoliyati bilan shug‘ullanuvchilarni ogohlantirdi.
Qayd etilishicha, Polsha Ichki ishlar vazirligining tegishli qarori bilan 21-fevraldan Belarus bilan “Kukuriki—Kozlovichi” chegarasi orqali barcha yuk avtotransport vositalarining ikki tomonlama harakatlanishi noma’lum muddatga to‘xtatilgan.
Hozirga kelib ushbu chegarada xorijiy mamlakatlar yuk tashuvchi transportlari to‘planib qolgan.Vaziyatni kuzatadigan bo‘lsak , avvalroq Polsha Belarus bilan chegaradagi eng yirik nazorat-o‘tkazish punktlaridan biri Bobrovnikini ham yopgan edi.
Polsha ichki ishlar vaziri Kaminskiyning ta’kidlashicha, bunday qaror “davlat xavfsizligi manfaatlaridan kelib chiqqan holda” qabul qilingan. Eslatib o'tamiz, bulardan tashqari hozirgacha, Belarus va Polsha o‘rtasidagi yana 3 ta chegara yopilgan
O‘zbekiston transport vazirligi “Shu munosabat bilan milliy tashuvchilardan Yevropa mamlakatlariga yuk tashuvlarini amalga oshirishda ushbu holatni inobatga olishlarini so‘radi.
Ta’kidlanishicha, hozirda o‘zbek milliy tashuvchilari yuk transportlarini Litva chegarasi orqali to‘siqlarsiz harakatlanishini ta’minlash uchun muzokaralar olib borilmoqda.
Yevropa davlatlariga harakatlanayotgan milliy tashuvchilarda ushbu vaziyat yuzasidan savollar tug‘ilsa quyidagi telefon raqamlariga qo‘ng‘iroq qilishlari mumkin: +998 (71) 202-05-01 (114) +998 (97) 709-16-00.
Izoh (0)