Amerikaning sobiq prezidenti Donald Tramp Ukrainaning omon qolishi va qudrati amerikaliklar uchun ham muhim, biroq Yevropa Ukrainaga AQSHdan ko‘ra ko‘proq yordam berishi kerak deb hisoblaydi.
Biz Ukrainaning omon qolishi Yevropa uchun muhimroq bo‘lishi kerakligiga qo‘shilamiz, ammo bu biz uchun ham muhim. Okean ajratib turganiga qaramay AQSH Ukrainadagi urush uchun Yevropadan 100 milliard dollar ko‘proq pul sarflayapti, — deb yozgan Tramp.
17-aprel kuni AQSH Kongressi Vakillar palatasi spikeri Mayk Jonson Ukraina, Isroil va Tayvanga yangi yordam bo‘yicha alohida qonun loyihalarini taklif qilgan. Takliflar uchun ovoz berish 20-aprel kuni bo‘lib o‘tishi kutilmoqda.
Yangi yordam paketi Kiyevga qariyb 60,8 milliard dollar ajratishni, Ukrainaga uzoq masofali ATACMS raketalarini topshirishni, shuningdek, ushbu yordamni taqdim etishda kreditlar tizimiga o‘tishni nazarda tutadi.
Vakillar palatasidan respublikachilarning aksariyati Amerikaning Ukrainaga ko‘proq yordam berishiga qarshi. AQSH prezidenti Jo Bayden tegishli qonun loyihalari Kongressda ma’qullansa, darhol imzolanishiga va’da bergan.
AFP agentligining xabar berishicha, Vashington Ukrainada davom etayotgan urush fonida Yevropa tomonidan Xitoyga bosimni kuchaytirish istagida.
Izoh (0)