Muvaffaqiyatli shoumendan tortib dunyodagi eng mashhur siyosatchigacha — Ukraina prezidenti Vladimir Zelenskiy 25-yanvar kuni 45 yoshga to‘ldi. Ukrainalik jurnalistlar prezident urush davrida qanday o‘zgargani haqida ma’lumot berdi.
Ma’lum qilinishicha, Zelenskiyning ham barcha siyosatchilar kabi tarafdorlari va muxoliflari bor, lekin ko‘pchilik Ukrainadagi urush sababli u keskin o‘zgarganini ta’kidlaydi. Rossiya bilan qarama-qarshilik paytida prezident qanday o'zgarishlarni boshdan kechirdi?
Zelenskiy har kuni ukrainaliklarga murojaat qilib, hisobot beradi. Ularga urush davrida motivatsiya berib, minnatdorlik bildiradi. U bir necha yil oldin muvaffaqiyatli aktyor, ssenarist, rejissyor va prodyuser sifatida tanilgan bo‘lsa, hozirda eng mashhur siyosatchi va nufuzli shaxs hisoblanadi.
“Ukrainadagi urush Vladimir Zelenskiyni tubdan o‘zgartirdi. Sizning e'tiboringizni tortadigan birinchi narsa — yuz qiyofasi. Buni 2021—2022-yil oxirida Ukraina rahbarining Yangi yil tabrigi videolarida aniq sezish mumkin”, — deydi jurnalistlar.
“Ikki xil qiyofa. Asosiy farq soqol o‘sgani yoki harbiy kiyimda emas. Shunchaki boshqacha yuz ifodasi”, — deydi psixoterapevt Oleg Chaban. U urush Zelenskiyni kuchliroq qilganiga ishonch bildirib, bu travmadan keyingi o‘sish ekanini ta’kidlaydi.
Zelenskiy xarakteridagi o‘zgarishlarni harbiy ekspert Oleg Jdanov ham payqagan. U buni AQSH rahbari Jo Bayden Zelenskiyga Ukrainadan evakuatsiya qilish taklifini rad etganida unga yangicha munosabatda bo‘lgani bilan izohlagan. Vladimir Zelenskiyni uzoq vaqtdan beri taniganlar urush Ukraina prezidentining yuziga charchoq ifodasini qo‘shgan bo'lsa-da, mavjud xarakterini ochiq ko‘rsatayotganini ilgari surgan.
Zelenskiyning tug‘ilgan kuni
25-yanvar kuni Ukraina prezidenti Vladimir Zelenskiy 45 yoshga to‘ldi. Ukraina birinchi xonimi ta’sirli post orqali uni tug‘ilgan kuni bilan tabrikladi.
“Odamlar mendan tez-tez yil davomida qanday o‘zgarganingni so‘rashadi. Men esa doim ‘o‘zgarish yo‘q’, deb javob beraman. O‘n yetti yoshimizda qanday tanishgan bo‘lsak, o‘shanday yigitsan. Ammo, aslida, o‘zgarishga uchragan narsa mavjud: hozir ancha kam tabassum qilasan. Ko‘proq tabassumingga sabab topilishini tilayman. Aslida, bu sabab nimadaligini hamma biladi”, — deb yozdi Yelena Zelenskaya va turmush o‘rtog‘iga sog‘lik tiladi.
Izoh (0)