AQSH Kiyevga harbiy yordamni qisqartirgan taqdirda, Buyuk Britaniya qo‘shinlarini Ukrainaga yuborishi mumkin. Bu haqda Britaniya sobiq bosh vaziri Boris Jonson ma’lum qildi.
Jonsonning ta’kidlashicha, Ukrainaning mag‘lubiyati Rossiyaning boshqa Yevropa davlatlariga, xususan, “Boltiqbo‘yi va Gruziyaga nisbatan tajovuzi” uchun yo‘l ochib beradi.
Agar Ukraina yiqilsa, chegaralarimiz yonida va Rossiya bilan chegaradosh bo‘lgan butun Yevropa qit’asidagi demokratiyalarda katta tahdidga duch kelamiz, dedi siyosatchi.
U Ukrainani qo‘llab-quvvatlashning uzoq muddatli moliyaviy afzalliklarini ta’kidlab, yordamdan voz kechish kelajakda Buyuk Britaniya uchun ancha katta xarajatlarga olib kelishini bildirdi.
Bu haqiqatan ham davlat mablag‘larining foydali sarmoyasidir. Agar hozir yordam bermasak, keyinchalik o‘z chegaralarimizni himoya qilish uchun ancha ko‘p mablag‘ sarflashimizga to‘g‘ri keladi, dedi Jonson.
Uning ta’kidlashicha Ukraina mag‘lubiyatga uchrasa, Britaniya o‘z ittifoqchilarini himoya qilish uchun Rossiya bilan to‘g‘ridan-to‘g‘ri harbiy to‘qnashuvga kirishishga majbur bo‘ladi.
Ehtimol, Britaniya qo‘shinlarini Ukrainani mudofaa qilish uchun yuborishimizga to‘g‘ri keladi, deya ogohlantirdi Jonson.
AQSHning yangi saylangan prezidenti Donald Trampning Ukrainaga nisbatan munosabati haqida gapirar ekan, Jonson Respublikachilar partiyasi ichida turli xil qarashlar mavjudligini aytdi. U respublikachilarning bir qismini Rossiya prezidenti Vladimir Putinga xayrixohligi uchun tanqid qildi.
Shuningdek, aynan respublikachi rahbar Kiyevga Javelin tankka qarshi raketa komplekslarini yetkazib berishga ruxsat berganini eslatdi. Mazkur komplekslar Ukraina Qurolli kuchlarining mudofaa qobiliyatini mustahkamlashda muhim rol o‘ynagan.
Bu yordamsiz Kiyev uchun jang butunlay boshqacha yakun topishi mumkin edi, dedi u.
Ukrainaga keyingi harbiy yordam so‘roq ostida
10-noyabr kuni AQSHning saylangan prezidenti kichik o‘g‘li Donald Tramp Kiyevga harbiy yordam ko‘rsatish doirasida Ukrainaga ajratiladigan mablag‘ni qisqarishini aytdi. U Instagram sahifasida Ukrainaga pul yuborishni masxara qiluvchi video joylashtirdi. Montaj qilingan kadrlarda Ukraina prezidenti Vladimir Zelenskiy Donald Tramp bilan yonma-yon turgan, so‘ngra kamera asta-sekin Zelenskiyga qaratiladi va uning ustiga dollarlar yog‘ila boshlaydi.
38 kunda keyin nafaqangdan mahrum bo‘lasan, deyilgan videoga izohda.
Ehtimol, gap 17-dekabr kuni bo‘lib o‘tadigan, respublikachi Donald Trampning prezidentlik saylovlaridagi g‘alabasi tasdiqlanadigan kun haqida ketgan Saylov natijalariga ko‘ra, u demokrat Kamala Harrisni barcha yettita tebranuvchi shtatda ortda qoldirib, g‘alaba qozondi. Tramp 312 ta, Harris esa 226 ta ovoz oldi. G‘alaba qozonish uchun esa 270 ta ovoz olish lozim.
Izoh (0)