Qo‘shma Shtatlar razvedka xizmati vakillari AQSHning saylangan prezidenti Donald Tramp uchun brifing o‘tkazishni boshladi. Bu haqda The Washington Post nashri xabar berdi.
AQSH rasmiylari orasidagi manbalarga ko‘ra, Milliy razvedka direktori idorasi Trampga saylovdan ko‘p o‘tmay maxfiy ma’lumotlarni taqdim qila boshlagan. Apparat vakillari “1952-yildan beri mavjud bo‘lgan an’anaga ko‘ra, saylangan prezidentga razvedka masalalari bo‘yicha brifinglar berishlarini” tasdiqlagan.
Saylov kampaniyasi chog‘ida Tramp jurnalistlarga maxfiy razvedka ma’lumotlarini olishni istamasligini, chunki uni oshkor qilganlikda nohaq ayblashlaridan qo‘rqishini aytgan.
Axios nashri Tramp hukumatni shakllantirish tezligi bo‘yicha zamonaviy Amerika tarixida rekord o‘rnatgani haqida xabar bergan edi. Xususan, u saylovdan so‘ng 12 kun ichida vazirlik lavozimlariga 12 ta tayinlovni amalga oshirgan.
Hukumatni shakllantirish amaldagi prezidenti Jo Baydendan besh baravar va Trampning birinchi kabinetini shakllantirishdagidan to‘rt barobar tezroq amalga oshgan.
“Bu tarixdagi hokimiyatni eng samarali topshirish yoki barcha me’yorlarni buzgan holda tekshiruvsiz, tadqiqotsiz va Senat bilan maslahatlashuvlarsiz amalga oshirilgan tayinlov jarayoni”, dedi hokimiyat almashinuvi masalalariga ixtisoslashgan Amerika universiteti Biznes maktabi dekani Devid Marchik.
Axios nashrining ta’kidlashicha, avvalgi administratsiyalar nomzodlarni tekshirishning belgilangan tartiblariga amal qilgan bo‘lsa, Trampning yondashuvi bu me’yorlarni buzmoqda. Donald Tramp administratsiyasidagi lavozimlar uchun hozirda ma’lum bo‘lgan nomzodlar:
- Vitse-prezident lavozimini Ohayo shtatidan senator Jey Di Vens egallaydi;
- Davlat kotibi Florida shtatidan senator Marko Rubio bo‘ladi;
- Milliy xavfsizlik bo‘yicha maslahatchi etib Vakillar palatasi a’zosi Mayk Uoltz tayinlanadi;
- Pentagon rahbari sifatida AQSH Milliy gvardiyasi faxriysi va teleboshlovchi Pit Hagset faoliyat yuritadi;
- Markaziy razvedka boshqarmasi boshlig‘i lavozimiga Milliy razvedkaning sobiq direktori Jon Retkliff tayinlanadi;
- Milliy razvedka direktori etib Demokratik partiyaning sobiq a’zosi Tulsi Gabbard tayinlanadi;
- Bosh prokuror va adliya vaziri Vakillar palatasi a’zosi Mett Gets bo‘ladi;
- Kichik Robert Kennedi AQSH sog‘liqni saqlash vaziri lavozimini egallaydi;
- “Chegara qiroli” lavozimiga immigratsiya-bojxona xizmatining sobiq rahbari Tom Homan va boshqalar tayinlanadi;
- energetika vaziri esa Liberty Energy neft xizmatlari kompaniyasi asoschisi va bosh direktori Kris Rayt bo‘lishi kutilmoqda.
Amerikalik milliarder Ilon Mask va tadbirkor Vivek Ramasvami davlat samaradorligini oshirish bo‘yicha yangi departamentga rahbarlik qiladi. Departament (DOGE) deb nomlanadi. U Dogecoin (DOGE) — Mask tarafdor bo‘lgan kriptovalyutaga ishora qiladi.
Izoh (0)