Qirg‘izistonda Milliy xavfsizlik davlat qo‘mitasi (MXDQ) rahbari Qamchibek Tashiyevga suiqasd uyushtirishni rejalashtirgan Ruslan Bosterinskiy laqabli uyushgan jinoiy guruh faoli qo‘lga olindi. Bu haqda 24.kg xabar berdi.
Maxsus xizmatlarga ko‘ra, 41 yoshli Ruslan Bosterinskiy Qirg‘izistonning eng mashhur “qonundagi o‘g‘risi” Qamchi Kolbayevning yaqin sheriklaridan biri bo‘lgan. U Issiqko‘l tumanidagi Bo‘steri qishlog‘ini nazorat qilgan. Bosterinskiy ilgari bosqinchilik va qotillik uchun sudlangan.
U qidiruvda bo‘lgan vaqtida Qirg‘iziston Milliy xavfsizlik davlat qo‘mitasi rahbariga suiqasd uyushtirishni rejalashtirgan. Qo‘lga olingan shaxs tergov izolyatoriga joylashtirilgan. U uyushgan jinoiy guruh tuzish va unda ishtirok etishda ayblanmoqda.
Qamchi Kolbayevning qo‘lga olinishi
2022-yilda MXDQ xodimlari tomonidan mashhur kriminal avtoritet Qamchi Kolbayev va uning yaqinlari bo‘lgan o‘n kishini qo‘lga olingandi. Ular Qirg‘iziston-Xitoy chegarasi yaqinida (Jeti-O‘g‘uz tumani) joylashgan “Bulat-M” ov o‘rmonzoridan qaytib kelayotganida “Qorasoy” chegara punktida ushlangan.
Tekshiruv chog‘ida ular chegara hududiga Qirg‘iziston davlat organlarining tegishli ruxsatnomalarisiz kelgani aniqlangan. Ularning yonlarida sakkizta o‘tochar qurol ham bo‘lgan. 2011-yil iyunida Kolbayev AQSHda rasman xalqaro narkobiznesning bosh ishtirokchilaridan biri deb tan olingan va mashhur “Birodarlar doirasi” ro‘yxatiga kiritilgan. AQSH u haqidagi ma’lumot uchun 5 million dollar mukofot va’da qilgandi.
Izoh (0)