Isroil bosh vaziri Binyamin Netanyaxu HAMAS tomonidan G‘azo sektorida garovga olinganlarni qaytargan har bir shaxsga 5 million dollar va’da qildi. Bu haqda Netanyaxu sektorga tashrifi chog‘ida ma’lum qildi.
Bu vaziyatdan qutulishni istagan falastinliklarga men shunday deyman: kimki bizga garovga olingan odamni olib kelsa, biz unga va uning oilasiga xavfsiz chiqib ketish imkoniyatini taqdim etamiz. Bundan tashqari, o‘g‘irlangan har bir kishi uchun 5 million AQSH dollari miqdorida mukofot beramiz. Tanlov sizniki, qaror qiling. Har qanday holatda ham natija bir xil bo‘ladi: barcha garovga olinganlarni qaytarib olamiz, dedi bosh vazir.
Shuningdek, u Isroil Falastin anklavidagi HAMASning barcha tuzilmalarini yo‘q qilish niyatida ekanini ta’kidladi.
G‘azoda HAMAS endi bo‘lmaydi. Bizning o‘g‘irlangan odamlarimizga zarar yetkazishga jur’at qilgan har bir kishi o‘z boshi bilan javob beradi. Biz sizni ta’qib qilib, albatta yetib olamiz, deya ogohlantirdi Netanyaxu.
HAMAS tomonidan Isroildagi shaxslarning garovga olinishi
2023-yil 7-oktyabrda Isroil G‘azo sektoridan raketalar hujumiga duch keldi. Shundan so‘ng, HAMAS harakatining jangchilari chegara hududlariga kirib, harbiylar va fuqarolarga o‘t ochdi hamda 200 dan ortiq kishini garovga oldi. Rasmiy ma’lumotlarga ko‘ra, o‘shanda Isroil tomonidan 1,2 mingga yaqin kishi halok bo‘lgan.
Bunga javoban Isroil Mudofaa kuchlari fuqarolik obyektlariga zarbalar berishni o‘z ichiga olgan “Temir qilichlar” operatsiyasini boshladi va G‘azo sektorini to‘liq qamal qilganini e’lon qildi: suv, elektr energiyasi, yonilg‘i, oziq-ovqat va dori-darmonlar yetkazib berish to‘xtatildi. Isroil hujumi oqibatida G‘azo sektorida halok bo‘lganlar soni 43 ,ming kishidan oshdi,103 mingdan ortiq kishi jarohatlandi.
Izoh (0)