Ukraina prezidenti 23-mart kuni kechqurun e’lon qilingan xalqqa videomurojaatida Krasnogorskdagi teraktda Ukrainaga qo‘yilgan ayblovga munosabat bildirdi.
Vladimir Putinning Crocus City Hall konsert zalidagi teraktga munosabatini oldindan aytish mumkin edi, chunki u va unga o‘xshaganlar hamisha bundan foydalanishga, sodir bo‘lgan voqeada boshqa birovni ayblashga harakat qilishadi, — dedi Vladimir Zelenskiy.
Uning so‘zlariga ko‘ra, Putin Rossiya fuqarolari bilan shug‘ullanish, ularga murojaat qilish o‘rniga bir kun Ukrainani bu voqeada qanday ayblash haqida o‘ylagan.
Ukraina rahbari, shuningdek, Kreml ham Ukrainaga bo‘lgan tajovuzda o‘zining har qanday harakatini doimo oqlab, sodir bo‘layotgan voqealar uchun aybni Kiyev zimmasiga yuklashini ta’kidlagan.
Zelenskiy hozir Ukraina tuprog‘ida o‘ldirilayotgan rossiyaliklar soni bunday teraktlarning oldini olish uchun yetarli bo‘lishini qo‘shimcha qilgan. Murojaat so‘ngida u terrorizm doim mag‘lub bo‘lishi kerakligini aytib, butun dunyoni odamlarni pul topish yo‘li deb hisoblaydiganlardan himoyalanishga chaqirgan.
Mutaxassislar Crocus City Hall’dagi teraktning uchta versiyasini ko‘rib chiqmoqda
22-mart kuni kechqurun Crocus City Hall konsert zalida sodir etilgan terakt joyida qidiruv ishlari olib borilmoqda. Voqea natijasida kamida 133 kishi halok bo‘lgan, yana 140 kishi jarohatlangan. Rossiya favqulodda xizmatlari vakillari bu yakuniy raqamlar emasligini ta’kidlagan.
Avvalroq AQSH razvedkasi Rossiyani “Islom davlati” terrorchilik guruhining bo‘limi hisoblangan Viloyat Xurosoni (ISHID-K) Rossiya hududida terakt tayyorlayotgani haqida oldindan xabardor qilgan edi. Aksar ekspertlar ISHIDning Moskvadagi teraktga aloqadorligi haqida ishonchli dalillar yo‘qligini ta’kidlagan.
Rossiya xavfsizlik xodimlari, xuddi Putin kabi, teraktda “Ukrainaning aloqdarolik” versiyasini targ‘ib qilmoqda. FXX teraktdan keyin qo‘lga olinganlarning Ukraina bilan aloqalari bo‘lganligini va ular Bryansk viloyatida, Rossiya va Ukraina chegarasidagi Troebortnoye nazorat-o‘tkazish punktidan unchalik uzoq bo‘lmagan joyda hibsga olinganini aytgan. Putinning aytishicha, terrorchilarning Ukrainaga o‘tishi uchun yo‘lak tayyorlangan. Kiyev teraktga aloqadorligi haqidagi ayblovlarni rad etgan. AQSH ham buning alomatlari yo‘qligini aytgan.
O‘z navbatida, Kiyevda Krokusga hujum Rossiya rasmiylari tomonidan uyushtirilgan bo‘lishi mumkin degan taxmin mavjud. Ukraina TIV bundan “Rossiya fuqarolarining safarbarligini kuchaytirish” uchun foydalanish mumkinligini ta’kidlab, 1999-yilda Rossiyadagi turar-joy binolaridagi portlashlarni misol qilib keltirgan. Xuddi shunday fikrni rossiyalik muxolif siyosatchi Garri Kasparov ham aytgan. Biroq xavfsizlik bo‘yicha ekspert va Bonn universitetining rossiyalik mutaxassisi Frank Umbax DW nashriga bergan intervyusida hozirda bunday taxmin uchun hech qanday dalil yo‘qligini ta’kidlagan. Uning so‘zlariga ko‘ra, terrorchilik hujumi ISHID jangarilari tomonidan amalga oshirilgan versiyasi Rossiya tashviqotiga to‘g‘ri kelmaydi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)