Европа иттифоқи Россия ва Яқин Шарқ, шунингдек, Қизил денгиз минтақасидаги гуруҳларга ҳарбий юк етказиб бергани учун Эронга қарши санкцияларни кенгайтирди.
Бу ҳақда Европа иттифоқи кенгашининг Брюсселдаги йиғилишида маълум қилинди.
“Ушбу қўшимча чора Эроннинг дронлари, ракеталари ва тегишли технологиялар ҳамда компонентларини етказиб бериш учун кемалар ҳамда портлардан фойдаланишга чекловлар киритишга қаратилган”, дейилади йиғилишдаги баёнотда.
Ҳужжатда таъкидланишича, “бугунги қарор ракета ва дронларни яратиш ҳамда ишлаб чиқаришда фойдаланиладиган компонентларни Европа иттифоқидан Эронга экспорт қилиш, узатиш, етказиб бериш ёки сотишни тақиқлайди”.
Эроннинг энг йирик кемага эгалик қилувчи компанияси Тhе Islamic Republic оf Iran Shipping Line Group ва унинг директорлари ҳам қора рўйхатга киритилган.
Аввалроқ ЕИ Россияни молиявий “қора рўйхат”га қўшишга чақирганди.
“Брюсселда Россияни жиноий даромадларни легаллаштириш ва терроризмни молиялаштириш хавфи юқори бўлган давлатлар рўйхатига киритиш учун етарли асослар мавжуд”, дея фикр билдирган Европарламент депутатлари.
Европарламент Москва Украинага қарши агрессив урушни Кремлга халқаро санкцияларни четлаб ўтиш имконини берувчи коррупцион схемалар орқали молиялаштираётганини таъкидлаган. Бундан ташқари, европалик депутатларнинг фикрича, мамлакатда давлат идоралари билан чамбарчас боғланган коррупция ва уюшган жиноятчилик даражаси юқори.
15 ноябрь куни Европа иттифоқи Россияга қурол етказиб бергани учун Хитойга қарши санкциялар жорий қилмоқчи экани хабар берилганди.
Маълум қилинишича, ЕИ дипломатияси раҳбари Жосеп Боррель 18 ноябрга белгиланган ташқи ишлар вазирларининг йиғилишидан олдин тегишли разведка маълумотлари ҳақида Европа иттифоқи давлатларини хабардор қилган.
У тақдим этилган далилларни “ишончли” деб атаган. Далилларга кўра, Россияга Украинадаги жангларда фойдаланиш учун Хитой томонидан қуроллар етказиб берилган. Боррель бунинг учун Хитойни жазолашни талаб қилди.
Унинг сўзларига кўра, Хитой фирмалари билан операцияларни тўхтатиш, активларни музлатиш ва ЕИ мамлакатларига киришни тақиқлашга олиб келадиган санкциялар рўйхатини яратиш зарур.
Изоҳ (0)