Amsterdamda isroillik “Makkabi” klubi muxlislariga qilingan hujumdan qariyb bir hafta o‘tib, Niderlandiya politsiyasi poytaxtda ommaviy yig‘ilishlar o‘tkazish taqiqiga qarshi chiqqan 300 ga yaqin Falastin tarafdori bo‘lgan namoyishchilarni hibsga oldi.
“Politsiya Dam maydonidagi namoyishda 281 kishini hibsga oldi”, deyiladi politsiya hisobotida.
Politsiya yig‘ilganlarni hududni tark etishga chaqirgan, biroq ko‘pchilik bunga rioya qilmagan. Shuningdek, namoyishchilarning bir qismi avtobusda markazdan uzoqroqdagi joylarga, ba’zilari esa politsiya bo‘limlariga olib ketilgani aytilgan.
Aksiya ishtirokchilari “Amsterdam genotsidga yo‘q deydi” va “Falastinga ozodlik” kabi shiorlar bilan namoyishga chiqqan. Ulardan aksariyati hibsga olish paytida qattiq qarshilik ko‘rsatgan.
Bu Amsterdamda 7-noyabr kuni isroillik futbol muxlislariga qilingan hujumdan keyin Falastin tarafdorlarining uchinchi mitingidir. Norozi olomonning asosiy qismini o‘smirlar va yoshlar tashkil etgan.
Isroillik futbol muxlislariga hujum
Joriy yil 7-noyabr kuni Amsterdamda niqobli shaxslar Yevropa ligasi doirasidagi mahalliy “Ayaks” va “Makkabi” o‘rtasidagi o‘yindan so‘ng isroillik muxlislarga hujum qilgan edi. Ularning aksariyati Falastin bayroqlarini ushlab, Falastin tarafdori va antisemitizm shiorlarini aytgan. Hujumchilar isroilliklar joylashgan mehmonxonalarga ham bostirib kirishga harakat qilgan.
10-noyabr kuni Amsterdamda namoyishlar vaqtinchalik taqiqlanganiga qaramay yana bir bor Falastin tarafdorlari mitingi bo‘lib o‘tdi, politsiya o‘nlab odamlarni hibsga olgan. 11-noyabr oqshomida shaharning g‘arbiy qismida bir necha o‘nlab Falastin tarafdorlari bo‘lgan yigitlar antisemitizm shiorlarini aytib, tramvayga hujum qilgan.
Yevropa ligasi doirasidagi “Makkabi” — “Beshiktosh” uchrashuvi Vengriyaga ko‘chirildi
Yevropa futbol uyushmalari ittifoqi Yevropa ligasi doirasida 28-noyabr kuni Turkiyada bo‘lib o‘tishi kerak bo‘lgan “Makkabi Tel Aviv” – “Beshiktosh Istanbul” o‘yini Vengriyaning Debretsen shahridagi neytral maydonga ko‘chirilganini eʼlon qildi.
Izoh (0)