Yevropa ittifoqi Rossiya bilan hamkorlik qilgani uchun Eronga qarshi yangi sanksiyalarni ma’qulladi va bu ro‘yxatga yettita jismoniy va yetti nafar yuridik shaxsni kiritdi.
YIga ko‘ra, ularning barchasi Rossiyaga ballistik raketalarni topshirish uchun javobgardir. Moskva va Tehron Ukrainada foydalanish uchun Eron qurollarini Rossiyaga yetkazib berishni rad etmoqda.
Qayd etilishicha, YI TIV rahbarlarining Lyuksemburgdagi yig‘ilishida shunday qaror qabul qilingan. Sanksiyalar Eronning uchta aviakompaniyasiga (Iran Air, Saha Airlines, Mahan Air), shuningdek, to‘rtta sanoat va transport kompaniyasiga, jumladan, eng yirik alyuminiy ishlab chiqaruvchilardan biri — Iran Alumina Company’ga qaratilgan.
Sanksiyalar, shuningdek, Islom inqilobi qo‘riqchilari korpusining “Quds” kuchlarining uch nafar a’zosi, Eronning Rossiyadagi elchixonasi harbiy attashesi Rizo Xosraviy Mog‘addam va Eron Mudofaa vaziri o‘rinbosari Seyid Hamzehni ham o‘z ichiga olgan.
Yevropa ittifoqining Eronga nisbatan Rossiya bilan hamkorlik qilish, shuningdek, “Yaqin Sharq va Qizil dengiz mintaqasidagi qurolli guruhlar hamda tashkilotlarni qo‘llab-quvvatlaganliklari uchun” ilgari tasdiqlangan sanksiyalari 2025-yil 27-iyulgacha amal qiladi. Bu rejim, boshqa YI cheklovlari rejimlari kabi, muntazam ravishda ko‘rib chiqiladi va uzaytiriladi.
Izoh (0)