Gollivud aktrisasi Salma Hayek milliarder turmush o‘rtog‘i Fransua Anri Pino bilan 15 yildan beri birgalikda baxtli hayot kechirmoqda. U o‘zining yuqori maqomiga qaramay, aktrisalik faoliyatidan zavq olishi va karyerasidan hech qachon voz kechmasligi haqida aytib o‘tdi. Hayekning so‘zlariga ko‘ra, u o‘ziga to‘q sharoitda yashaydi, ammo ishini ham tashlab qo‘yishni istamaydi.
Salma Hayek va Fransua Anri Pino o‘rtasida oilaviy byudjet va mol-mulk taqsimotini tartibga soluvchi nikoh shartnomasi tuzilmagan. Chunki aktrisa turmush o‘rtog‘iga moliyaviy jihatdan qaram bo‘lishni xohlamasligini aytgan. Salma The Wall Street Journal nashriga bergan intervyusida:
“Men hayotimning ko‘p jabhalarini mustaqil qo‘llab-quvvatlayman. Xayolimda doimo ma’lum miqdorda pul topish uchun bosim borligi menga yoqadi. Va menda hozirgidan ham ko‘proq pul topish istagi tug‘iladi”, degan.
Yulduzning qo‘shimcha qilishicha, u nufuzli va badavlat tadbirkor bilan turmush qurgach, Hayekning tanishlari u bilan faqat pul bilan bog‘liq mavzularda suhbatlasha boshlagan. Ko‘pchilik ularning nikohini o‘zaro kelishuv asosidagi bitim deb o‘ylagan.
“Meni umuman tanimagan, ammo badavlat bo‘lgan insonlar oldimga kelib, tanishishga harakat qila boshlagan. Ularning fikricha, barcha boy insonlar o‘zaro aloqalarni ushlab turishi lozim. Men esa bunday tanishuvlardan yiroq ayolman”, degan aktrisa.
Salma Hayek ko‘p yillar davomida Gollivuddagi eng muvaffaqiyatli aktrisa sifatida e’tirof etilgan, Fransua Anri Pino esa milliarder va moda olamidagi eng nufuzli odamlardan biri. U Alexander McQueen, Gucci, Saint Laurent Paris, Balenciaga, Bottega Veneta, Boucheron, Brioni, Christopher Kane kabi brendlarga egalik qiluvchi Kering kampaniyasini boshqaradi.
Ular 2007-yil mart oyida unashtirilgan. O‘sha vaqtda Salma birinchi farzandiga homilador edi. 2008-yil sentyabr oyida aktrisa qiz farzandini dunyoga keltirdi va 2009-yilda juftlik Parijda to‘y marosimini o‘tkazdi.
Izoh (0)