“Karib dengizi qaroqchilari” kinokartinasidagi roli orqali barchaga tanish bo‘lgan aktyor Jonni Depp sobiq rafiqasi Ember Hyordni ajrimdan yetti yil o‘tib kechirganini ma’lum qildi. Bu haqda 61 yoshli yulduz The Hollywood Reporter nashriga bergan intervyusida aytib o‘tdi va endilikda o‘tmishda yashamasligini ta’kidladi.
“Bu voqea hayotimdagi eng katta jarliklardan biri bo‘ldi va bu davrda men o‘zim uchun ko‘p narsalarni o‘rgandim”, dedi Depp va so‘nggi bir necha yil davomida karyerasidagi muvaffaqiyatsizliklar, undan yuz o‘girgan insonlar va shaxsiy hayotidagi jiddiy o‘zgarishlarni yodga oldi.
“To‘g‘risini aytsam, ayni daqiqada shu yerda o‘tirib, menga qilingan barcha hujumlarni va atrofdagilarning qanchalik qarshi chiqqanini aniq-tiniq eslayman. Qisqa vaqtda juda ko‘p ishlar bo‘lib o‘tdi va men bularning barini yaxshi eslab qoldim. Ammo nima bo‘lgan taqdirda ham, men bundan katta saboq oldim. Men bunchalik katta nafrat zaxirasiga ega emasman, chunki bu ham o‘ziga yarasha kuch talab etadi. Buncha yukni yelkamga ortishdan nima naf?”, dedi aktyor.
Jonni Depp sobiq rafiqasi tomonidan oilaviy tajovuzkorlikda ayblanganidan keyin Gollivud undan yuz o‘girganidan juda xafa bo‘lganini yashirmadi. Faqat 2022-yilda bo‘lib o‘tgan sud jarayonida Jonni g‘alaba qozonganidan so‘nggina u faoliyatini Yevropada davom ettirdi va “Janna Dyubarri” filmida ishtirok etdi. Shuningdek, Jonni Depp karyerasidagi bunday qulashni O.J.Simpsonning obro‘si bilan bog‘liq voqeaga qiyosladi.
Ma’lumot uchun, Jonni Depp va Ember Hyord 2011-yilda uchrashishni boshlagan va oradan to‘rt yil o‘tib ular turmush qurgan. Juftlik 2017-yilda munosabatlari yakunlanganini ma’lum qildi. Ajralishdan keyin Ember Hyord sobiq turmush o‘rtog‘ini oilaviy zo‘ravonlikda aybladi. “Akvamen” kinokartinasi yulduzi Ember Hyord dalil sifatida tanasidagi ko‘karishlarni va yaralarni ko‘rsatdi, biroq aktyor o‘ziga qo‘yilgan barcha ayblovni rad etdi.
Natijada Depp bor obro‘si va martabasini yo‘qotdi, kinostudiyalar u bilan ishlashni to‘xtatdi. Bir necha yil o‘tgach, Jonni Hyordni tuhmatda ayblab sudga berdi va 50 million dollar tovon talab qildi. Ember esa 100 million dollar talab qildi. Olti hafta davom etgan sud jarayonini butun dunyo tomosha qildi va millionlab tomoshabinlar Deppni qo‘llab-quvvatladi.
Hatto aktyorning sobiq ayollari — Vanessa Paradis va Keyt Moss ham uning tarafini olishdi. Depp bu safar g‘alaba qozondi. Bo‘lib o‘tgan voqealardan so‘ng Ember Madridga ko‘chib ketdi. Hozirda u qizining tarbiyasi bilan shug‘ullanmoqda va maxfiy hayot tarzini olib bormoqda. Mish-mishlarga ko‘ra, bugungi kunda Jonni Depp rossiyalik ayol Yuliya Vlasova bilan uchrashmoqda.
Foto: Instagram
Yaqinda aktyor o‘zining yangi rejissyorlik loyihasi “Modi: telbalik qanotida uch kun” filmi ustida ishlarini yakunladi. O‘tgan oy San-Sebastyan kinofestivalida premyerasi bo‘lib o‘tgan film italiyalik rassom Amedeo Modilyaning hayotidagi uch kun haqida hikoya qiladi.
Izoh (0)