Bu mashhurlar oliy ma’lumotsiz ham taniqli bo‘lish mumkinligini qayta-qayta isbotlamoqda. Faqat istak, intilishgina muhim, ana shunda omad ham keladi.
Jonni Depp
Uch marta “Oskar”, “Oltin globus”, BAFTA mukofotlariga nomzod bo‘lgan aktyor 100 dan ortiq kartinada rol o‘ynagan. Dastlab aktyor bo‘lishni xayoliga ham keltirmagan Jonni Depp 12 yoshida musiqachi bo‘lishni orzu qiladi — xuddi shu yoshda onasi unga gitara sovg‘a qilgandi.
To‘rt yildan so‘ng Depp maktabni tashlab, Los-Anjelesga ko‘chib o‘tadi va ijara uchun mablag‘i yo‘qligi sababli do‘stining mashinasida tunab yuradi.
Shunday qilib, Jonni o‘zini rok-musiqachi emas, balki aktyor sifatida sinab ko‘rishni maslahat bergan Nikolas Keyj bilan tanishadi. 1984-yilda Ues Kreyvenning “Vyazov ko‘chasidagi dahshat” qo‘rqinchli filmidagi Glen Lans roli uchun kastingga boradi.
U aktyor bo‘lish istagida yonmayotgan bo‘lsa-da, unda katta salohiyat borligini ko‘rgan taniqli rejissyorlarning fikrlariga quloq soladi. Deppdan hammadan ko‘proq Tim Byorton ilhomlanadi. Jonni uning ko‘plab loyihalarida, jumladan, “Alisa mo‘jizalar mamlakatida”, “Uyqu vodiysi” va “Charli va shokolad fabrikasi” filmlarida rol o‘ynagan.
Darvoqe, shon-shuhratga erishgan pallada ham Gollivud aktyori o‘z orzusidan qaytmadi — Elis Kuper va Jo Perri bilan birgalikda “Gollivud vampirlari” musiqiy guruhini yaratadi.
Jim Kerri
Aktyor, rejissyor, qiziqchi, teleboshlovchi va rassom Jim Kerri 16 yoshida — otasi ishdan ketganida maktabni tashlaydi. O‘sha paytda Jim ham opa-singillari va akasi bilan oilani boqish uchun ishlashiga to‘g‘ri keladi. Ular Toronto yaqinida joylashgan “Titan g‘ildiraklari” fabrikasida pol va unitazlarni yuvishadi. Bunday odatiy ishlardan Jim odamovi bo‘lib qoladi.
Kerri stendapda ham o‘zini sinab ko‘radi. Bir necha muvaffaqiyatsizlikdan so‘ng u bu ishni tashlaydi, lekin bir-ikki yildan so‘ng yana qaytib keladi — o‘shanda uni muvaffaqiyat kutardi.
Keyinchalik, aktyor Kanadadan AQSHga ko‘chib o‘tadi, uni komediyachi Rodni Dangerfild ko‘rib qolib, o‘z uyida konsert berishga taklif qiladi. Shunday qilib 80-yillarning boshida Kerriga omad kulib boqadi — uni Glen Salzmanning “Rezina yuz” filmida rol o‘ynashga taklif qilishadi.
Bir yil o‘tgach, 1984-yilda aktyor mashhur “Niqob” filmida rol o‘ynaydi.
Bred Pitt
Anjelina Jolining sobiq turmush o‘rtog‘i va “Jangchilar klubi”, “Janob Smit va Smit xonim”, “Tanishing, Jo Blek” filmlari yulduzi Bred Pittning deyarli oliy ma’lumoti bor, lekin u ham aktyorlik yo‘nalishida emas. Bir vaqtlar u jurnalistika va reklama fakultetida o‘qigan, lekin diplom ololmagan — chunki Gollivudni zabt etish uchun ketgan.
Dastlab mebel tashuvchi, haydovchi va restoranga chaqiruvchi (jo‘ja kostyumini kiyib yurardi) bo‘lib ishlaydi. Ishlab topgan puliga Pitt aktyorlik kurslariga qatnaydi.
Ko‘plab loyihalarda ishtirok etganidan so‘ng, omad kulib boqadi — dastlab 1987-yilda to‘liq metrajli “Hech kimning yeri”, 1991-yilda esa “Telma va Luiza” filmi chiqadi. Ikkinchi film tufayli Bred Gollivudda taniladi.
Xoakin Feniks
“Joker” filmi yulduzi Xoakin Feniks 9-sinfni tugatgan xolos. Gap uning qobiliyatida emas, yigitning ota-onasi sektant bo‘lgani sabab oila tez-tez ko‘chib yurishga majbur bo‘lganida. 1978-yilga kelibgina ota-onasi missionerlikdan ketadi va bolalarini reklamada suratga tushirish orqasidan pul ishlay boshlashadi.
Saksoninchi yillarda Xoakin rejissyorlar tomonidan takliflar ola boshladi va u asosan epizodlarda rol o‘ynaydi. Masalan, “Yetti aka-uka uchun yetti kelin” serialining 13-qismida ishtirok etadi.
Feniks hech qachon universitetda o‘qimagan, aktyorlik kurslariga qatnamagan, ammo bu uning dunyoga mashhur aktyor bo‘lishiga to‘sqinlik qilmadi.
Tom Kruz
To‘rt karra “Oskar” mukofotiga nomzod va uch karra “Oltin globus” sovrindori 14 yoshgacha 15 ta maktabni almashtirgan. U yana ruhoniy bo‘lishni ham o‘ylardi, lekin baribir sahnaga va aktyorlik faoliyatiga bo‘lgan muhabbati ustun keladi — Tom maktab to‘garagidagi ilk chiqishlari tufayli orzusiga ergashadi.
18 yoshida u Nyu Yorkka ko‘chib o‘tadi, u yerda dastlab ofitsiant bo‘lib ishlaydi va shundan keyingina Los Anjelesga keladi. U yerda agentlik bilan shartnoma imzolab, 1981-yilda “Cheksiz muhabbat” filmida Billi rolini ijro etadi. Shunday qilib, Kruz 30 yoshida Gollivud yulduziga va ko‘plab tomoshabinlarning kumiriga aylanadi.
Kemeron Dias
Moddiy jihatdan aktrisaning bolaligini havas qilarlik deb bo‘lmaydi: otasi neft minorasida ishchilar boshlig‘i bo‘lib, arzimagan maosh olgan, onasi esa ikki qizini boqish uchun bankda ishlagan. 15 yoshida qiz modellik agentligi bilan shartnoma imzolaydi va turli mamlakatlarda aylanib, katta pul ishlab topadi.
Biroz vaqt o‘tgach, Diasning agenti unga aktyorlik sohasida o‘zini sinab ko‘rishni taklif qiladi va u kasting bo‘yicha direktorning oldiga kiradi — uning ofisi modellik agentligi bilan bir binoda joylashgandi. Kameron qandaydir loyihalarda ikkinchi darajali rollar bor-yo‘qligiga qiziqadi, direktor esa unga “Niqob” filmidagi bosh rolni — Jim Kerri bilan birga ijro etishni taklif qiladi.
Kianu Rivz
Bo‘lajak aktyorning maktab yillari yaxshi o‘tmagan. Gap shundaki, Kianu disleksiyadan aziyat chekardi, shuning uchun unga yozish va o‘qishga qiynalardi, sinfdoshlari esa uni masxara qilishardi. Ammo bolaligidanoq shaxmatni a’lo darajada o‘ynab, katta yoshdagi raqiblari bilan musobaqalashdi. Besh yil davomida Rivz bir maktabdan ikkinchisiga ko‘chib yuradi, 16 yoshida esa uni maktabdan haydashadi.
Shundan so‘ng u ota-onasining uyidan ketib, tanishinikida yashaydi. Dastlabki paytlarda Kianu konkilarni charxlash, mahalliy qahvaxonada ishlash va butalarni kesish bilan kun kechiradi.
Izoh (0)