Amerikalik tadbirkor Ilon Mask 2022-yil oxiridan buyon Rossiya prezidenti Vladimir Putin bilan muntazam aloqada bo‘lib kelmoqda. Bu haqda AQSH, Yevropa va Rossiyadagi bir nechta amaldagi va sobiq amaldorlarga tayanib, The Wall Street Journal xabar berdi.
Manbalarga ko‘ra, Mask hamda Putin shaxsiy va ishbilarmonlik mavzularini, shuningdek, geosiyosiy taranglikni muhokama qilmoqda. Milliarderning Kreml bilan aloqalari haqidagi ma’lumotlar, aftidan, “qattiq sir saqlanmoqda”.
“Hatto AQSH administratsiyasidagi hamma ham bundan xabardor emas”, deyiladi xabarda.
Suhbatdoshlardan biri AQSH rasmiylariga Mask va Putinning aloqalari yoqmasligi, lekin Oq uy tadbirkorga hech qanday e’tiroz bildirmaganini aytmoqda. Ilon Maskning Rossiya prezidenti bilan aloqalari amaldagi Amerika ma’muriyatining ayrim xodimlarini tashvishga solmoqda, chunki AQSH Putinni o‘zining asosiy raqiblaridan biri deb hisoblaydi.
Bundan tashqari, Mask ba’zi maxfiy ma’lumotlarga kirish huquqiga ega, shuningdek, Amerika harbiy va razvedka xizmatlari bilan ishbilarmonlik aloqalarini o‘rnatgan. Ikki yil oldin Mask Rossiya prezidenti bilan muloqotdaligi haqidagi ma’lumotni qat’iyan rad etgandi.
WSJ manbalariga ko‘ra, ular o‘rtasidagi aloqalar joriy yilda ham davom etgan.
“Bir marta Putin Maskka Xitoy raisi Si Szinpinning Tayvan ustida Starlink sun’iy yo‘ldosh internetini yoqmaslik haqidagi iltimosini yetkazgan”, deydi ikkita manba.
Bu iltimosni Putin 2023-yil oxirida aytgan, dedi sobiq rossiyalik razvedkachi. Starlink hali ham Tayvanda aloqa xizmatlarini ko‘rsatmaydi. Kompaniya orolda xizmat ko‘rsatish “tez orada” boshlanishini bildirgan.
Izoh (0)