Janubiy Koreya chegara chizig‘i yaqinida Shimoliy Koreyaning 180 ta harbiy samolyotlari aniqlanganidan keyin, o‘zining kamida 80 ta qiruvchisini, shu jumladan, F-35A samolyotlarini ham havoga ko‘tardi. Bu haqda Yonhap agentligi xabar berdi.
Agentlik janubiy koreyalik harbiylarga tayanib xabar berishicha, KXDR samolyotlari faolligi 4-noyabr kuni 11:00 dan 15:00 ga qadar (Toshkent vaqti bilan 7:00 dan 11:00 gacha) kuzatilgan.
Shimoliy Koreya harbiy aviatsiyasi bir qancha hududlarda, shu jumladan, Sharqiy (Yapon) va G‘arbiy (Sariq) dengizlar hududida parvoz qilgan.
Avvalroq AQSH va Janubiy Koreya mudofaa vazirlari Lloyd Ostin va Li Chjon Sop Shimoliy Koreya tomonidan har qanday yadro hujumi Kim Chen Inning rejimiga nuqta qo‘yishi haqida ogohlantirgan edi. Ularning so‘zlariga ko‘ra, ular Pxenyanning nomaqbul xatti-harakatlariga “qat‘iy javob” ko‘rsatadi.
Shuningdek, AQSH Rossiya va Xitoy KXDRga o‘z ta’sirini o‘tkazib, uni yadro sinovlari o‘tkazish fikridan qaytarishini istayotgani ma’lum bo‘ldi. Pxenyan bir necha marta raketalar uchirgach, AQSH BMT Xavfsizlik kengashiga murojaat qilib, 4-noyabr, juma kuni Shimoliy Koreya bo‘yicha majlis o‘tkazishni so‘ragandi. Eslatib o‘tamiz, avvalroq KXDR so‘nggi uch kun ichida to‘rtinchi marta Yapon dengiziga qarata raketa uchirdi, bu safar Pxenyan uchta qisqa masofali ballistik raketani uchirgan. Raketalar parvozlari AQSH va Janubiy Koreyaning Vigilant Storm qo‘shma harbiy havo mashg‘ulotlari fonida yuz bermoqda, KXDR unga qarshi chiqqan. Mashqlar 31-oktabr kuni boshlangan bo‘lib, 4-noyabrga qadar davom etadi. Manyovrlarga 240 dan ortiq samolyotlar, shu jumladan, Amerikaning takomillashtirilgan F-35A ko‘rinmas qiruvchilari jalb qilingan. KXDR Seul va Vashingtonning mana shu va boshqa mashg‘ulotlari sababli, “Koreya yarim oroli qizg‘in nuqtaga aylantirib qo‘yilgani, u yerda harbiy keskinlik dunyo bo‘yicha eng kuchli ekani, mintaqadagi xavfsizlik muhiti esa yanada jiddiylashganini aytgandi. Oktabr oyida Shimoliy Koreya besh martadan ko‘proq raketalar uchirdi, shuningdek, qanotli raketalarni sinovdan o‘tkazdi. Bundan tashqari, Janubiy va Shimoliy Koreya harbiylari o‘rtasida 24-oktabr kuni otishma yuz berdi: KXDR kemasi Sariq dengizda demarkatsiya chizig‘ini kesib o‘tgani tufayli Seul ogohlantiruvchi o‘t ochdi, Pxenyan bunga javoban baravar o‘t ochish reaktiv tizimlaridan 10 ta snaryad uchirdi. Mavzuga doir:
Izoh (0)