AQSHning Teodor Ruzvelt aviatashuvchisi harbiy mashg‘ulotlarda qatnashish uchun 22-iyun kuni Janubiy Koreyaga kelgan. Bu haqda Janubiy Koreya nashrlari xabariga asoslanib, Reuters maʼlum qildi.
AQSH kemasi Janubiy Koreyaning Pusan portida qabul qilingan. Kema AQSH, Yaponiya va Janubiy Koreya ishtirokida Sharqiy Xitoy dengizida o‘tkaziladigan mashg‘ulotlarda qatnashishi bildirilgan.
Harbiy mashg‘ulotlar uch davlat rahbarlarining Kemp-Deviddagi kelishuviga asosan tashkil etilayotgani aytilgan. 2023-yilning avgust oyida AQSHda erishilgan ushbu kelishuv Xitoyning Janubiy va Sharqiy Xitoy dengizlaridagi “xavfli va tajovuzkor xatti-harakatlari”ga qarshi turishni maqsad qilgan.
Rasmiylar mashg‘ulotlarning bir qismi Yapon dengizida ham o‘tkazilishini bildirgan. Mashqlar xalqaro normalarni buzmagan holda, Yaponiya va Koreya suvlarida amalga oshirilishi eʼlon qilingan.
Bir guruh tahlilchilar Yapon dengizidagi harakatlar Shimoliy Koreya va Rossiyaga signal yuborishni maqsad qilganini bildirgan. Chunki, Rossiya prezidentining Shimoliy Koreyaga tashrifi va harbiy pakt imzolanishi Seul va ittifoqchilarining keskin eʼtiroziga sabab bo‘lgan edi. Harbiy pakt Rossiya va KXDR o‘rtasidagi ittifoqchilik bitimi sifatida ko‘rilgan.
Manbada aytilishicha, Janubiy Koreya so‘nggi marta bundan 7 oy muqaddam o‘z portida AQSHning Karl Vinson aviatashuvchisini qabul qilgan. O‘shanda Shimoliy Koreyaning yadroviy va raketa dasturlariga qarshi turish uchun Sariq dengiz sharqida harbiy mashg‘ulotlar o‘tkazilgan edi.
Izoh (0)