Shimoliy Koreya yaqin haftalarda sun’iy yo‘ldosh uchirishi haqida Yaponiyaga bildirish yubordi. Pxenyan Tokioni sun’iy yo‘ldoshni 31-may—11-iyun oralig‘ida uchirish rejalaridan xabardor qilgan, deb yozmoqda DW.
Kosmik apparatning uchirilishi Shimoliy Koreya tomonidan orbitaga harbiy razvedka sun’iy yo‘ldoshini joylashtirishga urinish bo‘lishi taxmin qilinmoqda. Mutaxassislarning fikricha, “josus” sun’iy yo‘ldoshni uchirish orqali KXDR o‘z kuzatuvini kuchaytirishga va mojaro yuzaga kelgan taqdirda, dushmanga aniqroq zarba berishga harakat qiladi.
Yaponiya va Janubiy Koreya hukumatlari Birlashgan Millatlar Tashkilotining raketa sinovlarini taqiqlash haqidagi rezolyutsiyasiga ishora qilib, Shimoliy Koreya rasmiylaridan sun’iy yo‘ldoshni uchirish rejalaridan voz kechishni talab qildi.
Xususan, Tokio apparatni yo‘q qilish bilan tahdid qildi, chunki Pxenyan tomonidan har qanday raketa uchirilishi Yaponiya hududlari uchun xavf tug‘diradi.
Yaponiya bosh vaziri Fumio Kisida Shimoliy Koreyaning har qanday raketani uchirishi BMT Xavfsizlik Kengashida qabul qilingan Shimoliy Koreyaning yadroviy va raketa faoliyatini qoralovchi rezolyutsiyalarni jiddiy buzish ekanini ta’kidladi.
“U sun’iy yo‘ldosh deb atalsa ham, uni ballistik raketa yordamida uchirish BMT Xavfsizlik Kengashi rezolyutsiyalarini buzish bo‘ladi va odamlar xavfsizligiga tahdid soluvchi jiddiy muammo keltirib chiqaradi”, — dedi Kisida.
Janubiy Koreya Tashqi ishlar vazirligi ham tegishli bayonot bilan chiqdi:
“Hukumatimiz mintaqada tinchlikka tahdid soluvchi provokatsiyalarni sodir etish oqibatlaridan qat’iy ogohlantiradi va noqonuniy uchirish rejasidan zudlik bilan voz kechishga chaqiradi”.
Seul AQSH, Yaponiya va xalqaro hamjamiyat bilan o‘zaro hamkorlik orqali “provokatsiyalarga qat’iy javob beradi”, deya qo‘shimcha qilgan vazirlik.
Yaponiya qirg‘oq xavfsizlik xizmati raketa Sariq dengiz, Sharqiy Xitoy dengizi va Filippinning Luzon oroli sharqidagi suvlarga qulashi mumkinlidan ogohlantirdi.
Rasmiy Tokio sun’iy yo‘ldoshning uchirilishini qurol sinovi deb bilmoqda. Yaponiya raketaga qarshi mudofaa tizimini shay holatga keltirdi va o‘z hududiga tahdid soladigan har qanday apparatni urib tushirishini ma’lum qildi. Bundan tashqari, bosh vazir Kisida rasmiylarga AQSH va Janubiy Koreya bilan yaqindan hamkorlik qilishni buyurdi, deb ta’kidlaydi AFP.
18-aprel kuni yakuniga yetgan “Yettilik guruhi” (G7) davlatlari tashqi ishlar vazirlarining Yaponiyadagi yig‘ilishida ishtirokchilar Shimoliy Koreyani yadro quroli yoki ballistik raketalarni ortiq sinovdan o‘tkazmaslikka chaqirgan. Ular Shimoliy Koreyaning yangi raketa sinovlariga “tezkor, birlashgan holda va hal qiluvchi xalqaro javob” va’da qilgan.
Izoh (0)